Peci nuk i pranon vërejtjet e KQZ-së për punën e dy kryetarëve: Guxo nuk zmbrapset

Bashkëkryetari i Listës “Guxo”, Faton Peci, ka reaguar pasi KQZ ka dhënë vërejte që kjo parti t’i ketë dy kryetarë.

Ai tha se nuk “mund t’i diskutojë vendimet e paqena”.

“Ajo që është e rëndësishme të qartësohet për opinionin në këtë fazë, është se para çdo procesi të votimit dhe aprovimeve dhe ndryshimeve statutare, çdo veprim e kemi dakorduar me përfaqësuesit e Komisionit Qendror Zgjedhor, që ishin të pranishëm para dhe gjatë punimeve të Kuvendit”, ka shkruar Peci.

Në fund, Peci ka shkruar se “Guxo nuk zbrapset para asnjë sfide”.

Postimi i plotë:

Sqarim për opinionin

Rreth lajmit të publikuar sot në media për mundësinë e kontestimit të legalitetit të ecurisë së Kuvendit të Parë të partisë sonë, në emër të Partisë Guxo, dëshiroj të qartësoj opinionin se ne nuk mund të diskutojmë mbi vendime të paqena.

Ajo që është e rëndësishme të qartësohet për opinionin në këtë fazë, është se para çdo procesi të votimit dhe aprovimeve dhe ndryshimeve statutare, çdo veprim e kemi dakorduar me përfaqësuesit e Komisionit Qendror Zgjedhor, që ishin të pranishëm para dhe gjatë punimeve të Kuvendit.

Një gjë është e qartë si kristali, se Guxo nuk zbrapset para asnjë sfide.

(Kosova Sot Online)