Albin Kurtit i shkojnë në zyrë dy emisarë evropianë

Emisarin e Gjermanisë për Ballkanin Perëndimor, Manuel Sarrazin dhe të Dërguarin e posaçëm të Sllovenisë për Ballkanin Perëndimor, Anžej Frangeš, i ka pritur sonte në takim Kryeministri i Kosovës, Albin Kurti, transmeton gazeta "Kosova Sot Online"

Kryeministri Kurti ka theksuar se veprimet e qeverisë së tij janë në shërbim të sundimit të ligjit dhe që marrin në konsideratë brengat e partnerëve ndërkombëtarë për sigurinë dhe paqen.

“Kryeministri Kurti u shpreh se vendimi dhe veprimet e qeverisë janë në shërbim të sundimit të ligjit dhe marrin parasysh brengat e partnerëve ndërkombëtarë për sigurinë dhe paqen. Ndërkaq sa i përket bojkotit të institucioneve nga Lista Serbe, tha se është i nxitur dhe orkestruar nga Beogradi që ka vazhduar qasjen destruktive në marrëdhëniet me Kosovën dhe se është përpjekje për ta mbuluar mosgatishmërinë për diskutime rreth elementeve të marrëveshjes kornizë që çon drejt normalizimin të plotë të raporteve. Në anën tjetër, Republika e Kosovës e ka dëshmuar gatishmërinë dhe konstruktivitetin e saj në këtë proces”, thuhet në komunikatën nga Zyra e Kryeministrit.

Kurti i ka njoftuar emisarët për zbatimin e shkallëzuar të vendimit të qeverisë për targat ilegale.

"Duke theksuar se deri sot në mëngjes janë lëshuar 1012 vërejtje për vozitësit me targa ilegale dhe se pavarësisht kësaj nuk ka asnjë incident shënuar; për punën e institucioneve për mbarëvajtjen e shërbimeve për të gjithë qytetarët; dhe për kërcënimet dhe sulmet që individë dhe banda kriminale po u bëjnë qytetarëve tanë në komunat në veri të vendit”, thuhet në njoftim.

(Kosova Sot Online)