Mafia shqiptare më e pajisur se policia

Operacioni i policisë shqiptare për çmontimin e kamerave të sigurisë të vendosura në mënyrë ilegale në të gjithë vendin, ka bërë jehonë edhe në mediat ndërkombëtare.

Media gjermane “Frankfurter Rundschau” e ka nisur titullin e shkrimit të saj me: Mafia shqiptare, më e pajisur se policia.

Në shkrim thuhet se fenomeni vendosjes së kamerave ilegale nga elementet kriminale, nuk është i panjohur për Europën, transmeton gazeta “Kosova Sot Online”.

Frankfurter Rundschau shkruan se klanet në Shqipëri kanë pothuajse gjithçka në monitorim falë teknologjisë së survejimit. Ekspertët flasin për “epërsi teknologjike të grupeve kriminale”.

Shkrimi i “Frankfurter Rundschau” – Titulli i medias gjermane: Mafia shqiptare! Më e pajisur se policia

Kontrolli i gjithanshëm i territorit po bëhet gjithmonë edhe më i zakonshëm. Edhe në Ballkan, kamerat e sigurisë të vendosura në kryqëzime, rrugë makinash dhe këmbësoresh, është një fenomen i njohur tashmë.

Kamerat e montuara në mënyrë ilegale në rrugët e Shqipërisë, të cilat nuk janë të fshehta, po ngrenë shumë pikëpyetje se kush është ekzaktësisht “vëllai i madh” i 2.8 milionë qytetarëve në vend.

Kjo pasi shumë prej kamerave të sigurisë, nuk janë instaluar vetëm nga oficerët e zbatimit të ligjit në shtetin Adriatik, por edhe nga shkelësit e ligjit. Këtu përfshihen klane të fuqishme, rivale me njëra-tjetrën për kontrollin e trafikut të drogës, jo vetëm po vëzhgojnë njëri-tjetrin, por po monitorojnë edhe lëvizjet e policisë.

Policia në Shqipëri çmontoi më shumë se 220 kamera të paligjshme vetëm në kryeqytet

Në mesin e janarit, policia shqiptare në qytetin Shkodrës nisi për herë të parë operacionin për çmontimin e më shumë se 50 kamera të paligjshme. Qoftë në Durrës, Elbasan, Fier, Korçë apo Vlorë – më shumë se 450 kamera janë hequr tashmë në të gjithë vendin. Vetëm në Tiranë u zbuluan dhe u çmontuan më shumë se 220 pajisje vëzhgimi të instaluara ilegalisht.

Lajmi për kamerat e sigurisë gjithnjë e më të lokalizuara nga pronarë të dyshimtë, jo vetëm që ka ngritur shqetësime për sigurinë e të dhënave në Shqipëri.

“Epërsia teknologjike e grupeve kriminale në krahasim me shtetin është shumë flagrante”, thotë Erida Skendaj, kryetare e Komitetit të Helsinkit në Tiranë.

Klanet e drogës në Shqipëri monitorojnë njëra-tjetrën me kamera të paligjshme

Edhe pse janë arrestuar dhjetra persona të dyshuar për instalimin e kamerave, sërish është e vështirë të “zbusësh” shqetësimin për sigurinë e shqiptarëve. Shqipëria konsiderohet si një nga prodhuesit më të mëdhenj të kanabisit në kontinent.

Qoftë edhe për vrasje, bandat e drogës janë shumë të “etura” për të pushtuar tregun ndërkombëtar dhe për pushtet.

(Kosova Sot Online)