Berisha: Kjo bandë arriti të paimagjinueshmen, rekrutoi edhe kryezbuluesin e SHBA, McGonigal!

Kryetari demokrat, Sali Berisha, komentoi nga Tepelena edhe skandalin Rama-McGonigal.

“A duhet të ngrihemi ne? Ne duhet të ngrihemi me të gjithë forcën tonë.

Analistët rendin nga një ekran në një ekran tjetër që t’u mashtrojnë juve. Zonja në SHBA e denoncoi Edi Ramën se ka darkuar në një lokal në Nju Jork me 10 mijë dollarë darka. Dilte çakalli i tij e thoshte se ka kushtuar 100 dollarë. Me paratë e Ramës e thotë këtë.

Se vetë Rama ka bërë 137 udhëtime me aeroplan me dhomë gjumi, se lodhet shumë se ka marrë pjesë vetëm në 19 mbledhje qeverie. Të gjitha të tjerat i ka Ballukja. Dhe del e thotë se këto udhëtime janë më të lira se të paraardhësit tim në linja private. Ndërkohë nuk e lejon komisionin hetimor për këtë çështje, se do nxjerrë se janë më shumë se 22 milionë euro shpenzime për udhëtime e vikende.

Këto ministra, 5 herë më shpesh shkojnë në Dubai se sa vijnë në Tepelenë.

Kjo bandë arriti të paimagjinueshmen, të rekrutojë kryezbuluesin e SHBA, McGonigal.

E para, t’ia bësh një vendi që të ka bërë aq të mira në histori, je më besëpreri i shqiptarëve që nga koha e Skënderbeut gjer më sot. Ky, duke na quajtur ne antiamerikanë, pse ne po mbronim vlerat e lirisë, vlerat e amerikanëve në Shqipëri, ky njeri nuk ka asnjë interes. Ne kemi interesa kombëtare dhe forca e idealeve tona është e pamposhtur.

Ju garantoj se këtë revolucion do e fitojmë. Misionarët nuk janë shumicë, por ata fitojnë, ata nuk humbasin. Ata nuk humbasin sepse sakrifikojnë.

Demokratët duhet të bindin çdo shqiptar se këtë betejë e kemi për çdo shqiptar. Ndaj, të ecim të vendosur, të ecim të guximshëm, të sigurt drejt fitores që meritojmë,” tha Berisha.

(Kosova Sot Online)