Ja kush do të takohet sonte me Gabriel Escobarin
Në rezidencën e ambasadorit amerikan në Prishtinë, sonte darkojnë krerët opozitarë, transmeton gazeta “Kosova Sot Online”.
Kjo me arsye pasi ata i pret emisari special Gabriel Escobar.
Para takimit të 18 marsit në Ohër mes Kryeministrit Albin Kurti dhe Presidentit serb, Aleksandër Vuçiq, emisari amerikan Gabriel Escobar ka vizituar Beogradin dhe sonte mbrëmë arrin në Prishtinë.
Takimin e parë e realizon me partitë opozitare, dy prej të cilave edhe më tutje nuk po e përkrahin propozimin evropian, të cilin e ka pranuar Kurti.
Nga PDK-ja kanë thënë se sonte do të ketë darkë në rezidencën e ambasadorit Jeff Hovenier dhe se kryetari i saj, Memli Krasniqi e ka konfirmuar pjesëmarrjen.
Burimet në LDK kanë thënë se kryetari i partisë, Lumir Abdixhiku do ta takojë sot Escobarin.
Ndërkaq, nesër paradite, Escobar takohet me Kryeministrin Kurti, për herë të fundit para takimit të Ohrit, që mbahet pasnesër.
Dy partitë më të mëdha opozitare, LDK dhe PDK nuk e përkrahin propozimin evropian, pasi në të nuk përfshihet njohja reciproke mes Kosovës dhe Serbisë.
(Kosova Sot Online)
