27-vjeçari mbijeton 6 ditë në temperatura nën zero gradë i bllokuar në veturën e aksidentuar

Një ngjarje e denjë për film është bërë publike në shtetin e Indianës në Amerikë, ku një 27-vjeçar ka qendruar i bllokuar në veturën e aksidentuar për 6 ditë me radhë në temperatura nën zero gradë celsius.

CNN shkruan se dy peshkatarët Mario Garcia dhe Nivardo De La Torre ishin njerëzit që i shpëtuan jetën Matthew Roim. Ata kishin dalë për peshkim dhe po kërkonin për një vend të përshtatshëm kur panë një automjet të shkatërruar pranë lumit. Vetura ishte e shkatërruar deri në atë pikë sa ata menduan se ishte një grumbull hekurishtesh të hedhura aty. Kur e kuptuan se ishte një veturë që kishte rënë nga ura e autostradës, ata u afruan. Garcia, duke tentuar të largonte airbagun, ai preku shoferin për të cilin mendoi fillimisht se kishte ndërruar jetë, por më pas ai lëvizi. 27-vjeçari, në gjendje tejet të rëndë, mbeti i befasuar që pa njerëz pasi i kishte humbur të gjitha shpresat. Ai iu tregoi se kishte ditë të tëra i ngujuar në sediljen e shoferit.

“Po tentonte të bërtiste, por askush nuk po e dëgjonte. Ai na tregoi se kishte qëndruar i bllokuar aty për ditë të tëra dhe kishte humbur pothuajse çdo shpresë se mund të mbijetonte”, ka rrëfyer Garcia.

27-vjeçari, me profesion saldator, nuk kishte ngrënë asgjë gjatë 6 ditëve, por kishte lagur buzët me pikat e shiut që kishin rënë gjatë kësaj kohe. Ai u dërgua menjëherë në spital dhe mjekëve iu desh t’i amputonin njërën nga këmbët.

Me temperaturat rreth -2 gradë celsius në zonë, një drejtues i policisë lokale e ka quajtur mrekulli që Mattheë Roim ka mbijetuar për 6 ditë.

(Kosova Sot Online)