Gjykata Speciale arreston edhe Hajredin Kuçin

Pas Isni Kilajt, Bashkim Smakajt e Fadil Fazliut, media merr vesh se me urdhër të Prokurorit të Specializuar është arrestuar edhe ish-Ministri i Drejtësisë, Hajredin Kuçi.

Arrestimi i tij është kryer herët në mëngjes. Edhe ai dyshohet për vepra penale kundër administrimit të drejtësisë.

Zyra e Prokurorit të Specializuar ka konfirmuar më herët aksionin e sotëm, duke thënë se operacionet janë për hetime për vepra penale kundër administrimit të drejtësisë.

Në njoftimin e lëshuar thuhet se aksionet janë autorizuar nga Dhomat e Specializuara të Kosovës dhe janë mbështetur nga EULEX.

“Zyra e Prokurorit të Specializuar (ZPS) po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë. Operacionet e ZPS-së janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)”, thuhet në njoftim.

Arrestimin e Kilajt e ka konfirmuar  djali i tij, Blendi.

“Sot rreth orës 07:00 të mëngjesit është arrestuar babi. Nuk kemi informacione diqka se pse ka ndodhë arrestimi prapë”, ka thënë ai.

Ndërkohë, arrestimin e Fadil Fazliut e ka përmendur ushtruesi i detyrës së Kryetarit të OVL e UÇK’së, Faton Klinaku.

(Kosova Sot Online)