Shqipëria në ditë zie për Papa Françeskun

Këtë të shtunë, Shqipëria ka shpallur ditë zie kombëtare në nderim të Papa Françeskut, të cilit sot i jepet lamtumira e fundit në një ceremoni madhështore në Vatikan, transmeton gazeta “Kosova Sot Online”.

Në këtë moment dhimbjeje dhe respekti, Kryeministri Edi Rama ka reaguar përmes një mesazhi në rrjetet sociale, duke kujtuar figurën e jashtëzakonshme të Atit të Shenjtë dhe lidhjen e tij të veçantë me Shqipërinë. Rama e cilësoi Papa Françeskun si një lider shpirtëror të madh dhe një mik të çmuar të shqiptarëve, duke rikujtuar vizitën e tij historike në Tiranë.

“Mirëmëngjes dhe duke nderuar në këtë ditë zie kombëtare jo vetëm një Papë të jashtëzakonshëm, por edhe një mik të jashtëzakonshëm të Shqipërisë, Françeskun, Atin e Shenjtë, ju uroj të gjithëve një të shtunë të qetë me familjet tuaja”, shkroi Kryeministri.

Ceremonia e sotme në Vatikan pritet të mbledhë personalitete të shumta nga e gjithë bota, për t’i dhënë nderimet e fundit njërit prej Papëve më të dashur të kohëve moderne.

(Kosova Sot Online)