Dodik kërkon ndihmën e Rusisë për largimin e forcave ndërkombëtare
Ish-presidenti i shkarkuar i Republikës Srpska, Milorad Dodik, i cili humbi mandatin pas një vendimi gjyqësor të formës së prerë, ka paralajmëruar një vizitë të afërt në Moskë ku, sipas tij, do të kërkojë nga përfaqësuesit rusë që të vendosin veto në Këshillin e Sigurimit të OKB-së për zgjatjen e mandatit të misionit paqeruajtës të BE-së në Bosnje dhe Hercegovinë – EUFOR “Althea”, transmeton gazeta “Kosova Sot Online”.
Dodik, i njohur për qëndrimet e tij proruse, deklaroi se Bosnja dhe Hercegovina ndodhet “nën okupim” dhe se për këtë situatë fajësoi përfaqësuesin e lartë ndërkombëtar Christian Schmidt si dhe misionin ushtarak EUFOR. “Kemi një administratë civile të huaj të udhëhequr nga një i huaj, Schmidt, dhe një pjesë të armatosur të kësaj okupimi që është Althea. Që të heqim dorë nga kjo, duhet të jemi një shtet më vete,” tha Dodik, duke shtuar se “Republika Srpska duhet të shpallet shtet i pavarur”.
Gjatë intervistës për median shtetërore ruse Sputnik, Dodik tha se në Moskë do t’i kërkojë zyrtarisht Rusisë që të tërheqë mbështetjen për misionin ndërkombëtar dhe të vendosë veto për zgjatjen e EUFOR-it në Bosnje dhe Hercegovinë. Ai pretendon se forcat ndërkombëtare janë përdorur si mjet kërcënimi ndaj serbëve të Bosnjës.
Dodik nuk u ndal vetëm në kritika ndaj misioneve ndërkombëtare, por e lidh haptazi pavarësinë e Republikës Srpska me ndikimin rus. “Do t’i kërkoj miqve tanë rusë ndihmë për largimin e Althea-s. Pastaj, në bazë të së drejtës për vetëvendosje që gjendet edhe në Kushtetutën e BiH, do të ndërmarrim hapat për një referendum përfundimtar për pavarësinë tonë,” u shpreh ai.
Ai po ashtu komentoi edhe zhvillimet ndërkombëtare, duke sugjeruar një marrëveshje të mundshme midis presidentit rus Vladimir Putin dhe kandidatit republikan amerikan Donald Trump. “Po shihet qartë se mund të vijë një periudhë e ngrohjes në marrëdhëniet mes Putinit dhe Trumpit. Ndërkohë evropianët mezi presin në radhë,” tha Dodik, duke e paraqitur veten si një aktor që ka ruajtur lidhje me Rusinë edhe kur të tjerët hezitonin.
(Kosova Sot Online)
