Abazi: Dimal Basha është diagnoza e sëmundjes së Kurtit

Anëtari i Aleancës për Ardhmërinë e Kosovës, Haki Abazi, ka thënë se kryetari i sapozgjedhur, Dimal Basha, është diagnoza e sëmundjes së kreut të VV-së, Albin Kurtit, transmeton gazeta “Kosova Sot Online”.

Sipas Abazit, Kurti nuk lejon që edhe një politikan si Glauk Konjufca të bëhet kryetar kuvendit që të mos e përcjell agjendën e tij.

“Për të, duhet zgjedhur një personalitet që nuk mbledh pas vete përkrahje të deputetëve, nuk ka kapacitet të mjaftueshëm për ta ngjallur debatin brenda grupit parlamentar të VV-së dhe mendoj se ka qenë mendimi që Dimalin s’do ta votojë opozita, do të mbetet në pozitën e ngurtë drejt tij dhe befasisht opozita bëri një lëvizje nga pozicioni”.

“Mua më dhimbet Dimali që i ka hy këtij akrobacioni politik, pasi mendoj se goditjet më të rënda dhe të shpeshta do të vijnë nga makineria pasi ai nuk mund të lejohet as të fillojë ta kryej punën e tij, përderisa agjenda e Kurtit është sabotimi i krijimit të institucioneve të vendit”, tha Abazi.

Tutje, ai u shpreh se për të, kuvendi është i vdekur derisa Kurti e monopolizon veprimtarinë dhe funksionimin e kuvendit.

“Kjo është arsyeja që atij i duhen sa më shumë servilë e të pa kurriz në grupin parlamentar që nuk e vënë asnjëherë në pikëpyetje se a është duke shkuar në drejtimin e duhur debati demokratik dhe funksionimi i komisioneve të parlamentit”, tha ai.

(Kosova Sot Online)