Hamasi do ta ‘studiojë’ propozimin e Trumpit për Gazën

Hamasi tha se do ta diskutojë planin e paqes të Donald Trumpit për Gazën brenda vendit dhe me fraksione të tjera palestineze para se të japë një përgjigje, transmeton gazeta "Kosova Sot Online".

Kryeministri izraelit, Benjamin Netanyahu, e ka mbështetur tashmë planin, por mbetet e paqartë nëse Hamasi do të bjerë dakord – ose kur mund të japë përgjigjen e tij.

Propozimi kërkon që Hamasi të dorëzohet dhe të çarmatoset në këmbim të përfundimit të luftimeve, ndihmës humanitare dhe premtimit të rindërtimit në Gaza. Territori është shkatërruar nga lufta, me numrin e të vdekurve që tani është më shumë se 66,000 palestinezë, sipas ministrisë së shëndetësisë të Gazës.

Trump dhe Netanyahu e njoftuan planin pas bisedimeve në Shtëpinë e Bardhë të hënën, dhe mbështetja për të ka ardhur nga bashkësia ndërkombëtare.

Një zyrtar i lartë i Hamasit i tha Associated Press se grupi do të “fillojë ta studiojë atë sot” me fraksione të tjera, pasi të marrë propozimin nga ndërmjetësit egjiptianë dhe ata të Katarit.

Nuk u dhanë shenja se kur do të mund të përgjigjet Hamasi. Zyrtari foli në kushte anonimiteti.

(Kosova Sot Online)