Papa Leone kufizon pushtetin e Bankës së Vatikanit

Papa Leone XIV i ka hequr përgjegjësinë ekskluzive për investimet, Institutit për Veprat e Fesë (IOR), transmeton gazeta "Kosova Sot Online".

Praktikisht, Ati i Shenjtë i kthen kompetencat APSA-s (Administrata e Pasurisë së Selisë Apostolike), duke kufizuar pushtetet e IOR-it, që është banka e Vatikanit.

Kjo thuhet në një letër apostolike, në formën e një “Motu Proprio” të Papës, me titullin “Coniuncta cura”, që ka të bëjë me aktivitetet e investimeve financiare të Selisë së Shenjtë.

Në tekst, Papa, duke e mbështetur vendimin te parimi i “bashkëpërgjegjësisë në bashkësi për shërbimin e Kurisë Romake, siç është kërkuar nga Papa Françesku dhe e përcaktuar në Kushtetutën Apostolike Praedicate Evangelium”, thekson se kjo “kërkon që të konsolidohen dispozitat e miratuara ndër vite dhe të përcaktohen qartë rolet dhe kompetencat e secilit institucion, në mënyrë që të mundësohet një bashkëpunim i ndërsjellë”.

Zgjedhja e Papa Françeskut

Banka e Vatikanit kishte marrë nga Papa Françesku të drejtën ekskluzive për menaxhimin e investimeve me fondet e Selisë së Shenjtë, por me dokumentin e publikuar sot, kthehet një lloj pluralizmi në këtë fushë, duke ia kthyer këtë funksion edhe APSA-s, që kësisoj, rifiton një rol bankar, që e kishte humbur.

“Në përcaktimin e aktiviteteve të investimit financiar të Selisë së Shenjtë, Administrata e Pasurisë së Selisë Apostolike në përgjithësi bën përdorim të strukturës organizative të brendshme të Institutit për Veprat e Fesë (IOR), përveç rasteve kur organet kompetente, sipas statutit të Komitetit për Investime, e konsiderojnë më efikase apo më të përshtatshme përdorimin e ndërmjetësve financiarë të vendosur në shtete të tjera”.

Bashkëpërgjegjësia

Tre janë pikat e miratuara; ndër to, në pikën 3 thuhet pikërisht se “në përcaktimin e aktiviteteve të investimit financiar të Selisë së Shenjtë, APSA zakonisht përdor strukturën e brendshme organizative të IOR-it, përveç rasteve kur Komiteti për Investime vendos ndryshe”.

“Bashkëpërgjegjësia në bashkësi” – thuhet në Motu Proprio-n e publikuar sot – është një nga parimet për shërbimin e Kurisë Romake, siç është kërkuar nga Papa Françesku dhe e vendosur në Kushtetutën Apostolike Praedicate Evangelium, të datës 19 mars 2022.

Kjo përgjegjësi e përbashkët, që përfshin edhe institucionet kuriale, të cilat merren me aktivitetet e investimeve financiare të Selisë së Shenjtë, kërkon që të konsolidohen dispozitat e mëparshme dhe të përcaktohen qartë rolet dhe kompetencat e secilit institucion, duke mundësuar kështu një dinamikë bashkëpunimi të ndërsjellë.

Duke marrë parasysh këto arsye, “duke vlerësuar me kujdes rekomandimet e miratuara njëzëri nga Këshilli për Ekonominë dhe duke u konsultuar me persona ekspertë në këtë fushë”, Papa me këtë Letër Apostolike në formën e Motu Proprio miraton “plotësisht atë që është rekomanduar” dhe vendos që “Rescriptum-i me titull ‘Udhëzimi mbi administrimin dhe menaxhimin e aktiviteteve financiare dhe të likuiditetit të Selisë së Shenjtë dhe të institucioneve të lidhura me Selinë e Shenjtë’, i datës 23 gusht 2022, shfuqizohet”. 

(Kosova Sot Online)