Bisedimet për armëpushimin në Gaza rifillojnë sot

A.P /
08 October 2025 - 11:06

Negociatat midis Hamasit dhe Izraelit do të rifillojnë sot në qytetin egjiptian Sharm el-Sheikh.

Të dy palët dhe ndërmjetës të shumtë po punojnë drejt arritjes së një marrëveshjeje bazuar në planin e armëpushimit të Presidentit të SHBA-së Donald Trump për Gazën.

Bisedimet synojnë të zbatojnë fazën e parë të propozimit të administratës Trump, e cila përfshin lirimin e të gjithë pengjeve dhe lirimin e një numri të caktuar të të burgosurve palestinezë.

Izraeli dhe Hamasi kanë bërë “përparim” gjatë dy ditëve të para të negociatave, tha një burim për CNN, por ka të ngjarë që të ketë ende ditë negociatash.

Ja të rejat më të fundit:

Shumë detaje kyçe janë të paqarta: Katari, si ndërmjetësues, tha se shumë nga detajet në planin e Trump ende nuk janë trajtuar në negociata. Kryeministri i Katarit do t’i bashkohet bisedimeve sot.

Kërkesat e Hamasit: Kërkesat e grupit militant përfshijnë një armëpushim të përhershëm, tërheqjen e ushtrisë izraelite nga Gaza dhe hyrjen e pakufizuar të ndihmës humanitare. Kryenegociatori i Hamasit tha se qëllimet e tij mbeten vetëvendosja palestineze, fundi i luftës dhe tërheqja e Izraelit nga Gaza.

Ndërmjetësuesit amerikanë do të mbërrijnë: I dërguari për Lindjen e Mesme, Steve Ëitkoff, si dhe dhëndri i Trump, Jared Kushner, do t’i bashkohen bisedimeve sot. Të dy ishin thellësisht të përfshirë në propozimin e Trump.

Lëvizjet e delegacionit izraelit: Ministri izraelit i Çështjeve Strategjike, Ron Dermer, ka të ngjarë t’i bashkohet bisedimeve sot, sipas një zyrtari të lartë izraelit. Dermer është kryenegociatori dhe konsiderohet si personi më i besuar i kryeministrit Benjamin Netanyahu.

Roli i Turqisë: Shefi i Agjencisë Kombëtare të Inteligjencës së Turqisë, Ibrahim Kalin, gjithashtu do t’i bashkohet bisedimeve sot. Turqia është një aleat i Hamasit që strehon disa nga udhëheqësit e saj.

(Kosova Sot Online)