Kërcënohet me vdekje Nicolas Sarkozy pas hyrjes në burg

Ish-presidenti francez Nicolas Sarkozy mori kërcënime me vdekje nga një i burgosur tjetër në burgun La Santé të Parisit, ku filloi të vuante dënimin këtë javë, njoftoi të mërkurën zyra e prokurorit publik të Parisit, duke shtuar se është hapur një hetim, transmeton gazeta "Kosova Sot Online".

“Më 22 tetor 2025, drejtori i burgut La Santé informoi zyrën e prokurorit në Paris për një video që po qarkullonte në rrjetet sociale, e regjistruar qartë nga një i burgosur, në të cilën ai bënte kërcënime pas mbërritjes së Nicolas Sarkozy-t në institucion”, thuhet në deklaratën që zyra e prokurorit i dërgoi Reuters.

Tre të burgosur u morën në pyetje si pjesë e hetimit dhe, gjatë kontrollit, u sekuestruan dy telefona celularë, shtohet më tej në deklaratë.

Sarkozy mbërriti në burgun La Santé të Parisit të martën për të vuajtur një dënim me pesë vjet heqje lirie për komplot në financimin e fushatës së tij zgjedhore të vitit 2007 me fonde nga Libia, një goditje e papritur për njeriun që udhëhoqi Francën nga viti 2007 deri në vitin 2012.

Ish-presidentit i janë caktuar dy oficerë policie të armatosur për ta mbrojtur gjatë vuajtjes së dënimit, një veprim që ka shkaktuar pakënaqësi nga sindikata e rojeve të burgjeve.

Dënimi i Sarkozy-t i jep fund një beteje ligjore shumëvjeçare mbi akuzat se ai mori miliona dollarë gjatë fushatës zgjedhore të vitit 2007 nga udhëheqësi libian Muammar al-Gaddafi, i cili më vonë u rrëzua dhe u vra gjatë Pranverës Arabe.

Edhe pse Sarkozy u shpall fajtor për komplot së bashku me bashkëpunëtorë të ngushtë që e ndihmuan ta realizonte planin, ai u lirua nga akuzat që lidhen me marrjen personale të parave ose përdorimin e tyre.

Ai mohoi çdo shkelje dhe e quajti çështjen të motivuar politikisht.

Sarkozy, i dënuar muajin e kaluar, është ish-udhëheqësi i parë francez që përfundon në burg që nga bashkëpunëtori nazist, Marshal Philippe Pétain, në fund të Luftës së Dytë Botërore.

(Kosova Sot Online)