Trump: Ky kryetar komunist më kërkoi takim

Presidenti i Shteteve të Bashkuara të Amerikës, Donald Trump, ka njoftuar se të premten planifikon të takohet me kryetarin e sapozgjedhur të New Yorkut, 34-vjeçarin Zohran Mamdani, në Shtëpinë e Bardhë, transmeton gazeta "Kosova Sot Online".

“Kryetari komunist i New Yorkut, Zohran ‘Kwame’ Mamdani’, ka kërkuar takim. Kemi rënë dakord që ky takim të zhvillohet në Zyrën Ovale më 21 nëntor. Më shumë detaje do bëhen të ditura më vonë”, ka shkruar Trump në Truth Social.

Edhe ekipi i Mamdanit e ka konfirmuar takimin, duke thënë se kështu është zakoni.

Ata kanë bërë të ditur se do të diskutojnë me Trumpin për sigurinë publike dhe ekonomike dhe planin e përballueshmërisë “për të cilin votuan më shumë se një milion banor të New Yorkut”:

Mamdani, i cili e përshkruan veten si socialist demokrat, do të bëhet kryetari i parë mysliman i New Yorkut dhe personi më i ri që mban këtë pozicion që nga shekulli i 19-të.

Do ta marrë detyrën në fund të dhjetorit.

Mamdani e Trumpi kanë pasur përplasje të vazhdueshme në distancë.

(Kosova Sot Online)