Moska: Nuk do të bëjmë asnjë lëshim

Rusia nuk do të pranojë asnjë lëshim në pikat themelore që lidhen me konfliktin në Ukrainë, ndërsa vëren se Kievi vazhdon të marrë armë dhe informacione inteligjence nga Shtetet e Bashkuara, transmeton gazeta "Kosova Sot Online".

Gjithashtu, Moska thekson se sa i përket çdo përpjekjeje për zgjidhje diplomatike të luftës, ajo është “në kontakt të vazhdueshëm” me Kinën.

Deklaratat u bënë nga zëvendësministri rus i Jashtëm, Sergey Ryabkov, në një moment kur diplomacia amerikane ka intensifikuar përpjekjet për të gjetur një zgjidhje për luftën në Ukrainë.

Nga njëra anë, Ryabkov tha se Moska “përshëndet” nismën amerikane. Nga ana tjetër, ai u shpreh qartë se “nuk mund të flitet për lëshime apo hapa pas” sa i përket qëndrimit të Rusisë mbi çështjet kyçe në procesin e zgjidhjes së mosmarrëveshjeve, përfshirë ato të lidhura me “operacionin special ushtarak”.

Ai shtoi se disa elementë të takimit të fundit mes presidentëve të Rusisë dhe SHBA-ve në Anchorage “përfaqësojnë tashmë zgjidhje kompromisi”, siç ka theksuar edhe presidenti Putin.

Ryabkov nënvizoi gjithashtu se, për momentin, Rusia “nuk është e gatshme të diskutojë publikisht asnjë detaj” të planit të Trump për Ukrainën, përfshirë variantet e ndryshme të tij.

Sipas zëvendësministrit, pozicioni i Rusisë mbetet i pandryshuar dhe të gjitha diskutimet e mëtejshme do të zhvillohen vetëm në kanale diplomatike.

(Kosova Sot Online)