Berisha: PD do të bëjë përpjekje për zgjedhjet më transparente
Kreu i PD-së, Sali Berisha, u shpreh se Partia Demokratike po përqendron të gjitha energjitë e saj në betejën për rikthimin e votës së lirë, duke theksuar se kjo fazë nuk ka të bëjë me pushtetin, por me çlirimin e qytetarëve nga farsat elektorale të qeverisë Rama, transmeton gazeta "Kosova Sot Online".
Ai theksoi se opozita nuk mund të marrë kurrë pushtetin për sa kohë që Edi Rama kontrollon proceset zgjedhore dhe përdor mekanizmin e shtetit për të manipuluar rezultatin. Sipas Berishës, cikli i farsave zgjedhore sa vjen e përkeqësohet, duke rritur artificialisht përqindjet e votave të pushtetit dhe duke thelluar krizën demokratike në vend. Në këtë situatë, PD-ja synon zgjedhje më transparente dhe me integritet më të lartë, ndërsa Berisha theksoi se jo përçarja, por bashkimi është e vetmja rrugë për të arritur qëllimet dhe për të garantuar besimin e qytetarëve.
Ai shtoi se kapërcimi i përplasjeve të brendshme ka qenë akti më i përgjegjshëm që partia ka ndërmarrë përballë shqiptarëve.
Fjala e tij:
Në këtë moment, rast, duhet të ju sqaroj ju dhe çdo demokrat, se kjo kohë, kjo fazë nuk është beteja për pushtet për ne, është beteja për votën e lirë të shqiptarëve.
Se opozita pushtet nuk merr kurrë me Edi Ramën në qeveri. Dhe Edi Rama me farsë elektorale nuk largohet.
Çfarë tregon historia. Historia tregon se, farsa zgjedhore nga njëra tek tjetra shkojnë duke u rritur. Në kuptimin se, në rast se në njërën farsë janë fituar 52% të votave, në farsën tjetër bëhen 62-65%. Ndaj dhe ne në këtë fazë jemi në fazën e përpjekjes tonë për të çliruar shqiptarët dhe për të rikthyer votën e lirë.
Përsa i përket objeksioneve. Sigurisht që PD do të bëjë përpjekje për zgjedhjet më transparente dhe me integritet më të lartë. Por jo përçarja, por bashkimi është rruga, pavarësisht se na pëlqen apo jo, por rruga e vetme për të arritur qëllimet.
Në këtë kontekst, në rast se ne kemi pasur përplasje të brendshme, kapërcimi i tyre në vlerësimin dhe bindjen time më të thellë, ishte akti më i përgjegjshëm që ne bëmë para shqiptarëve.
(Kosova Sot Online)
