Vuçiq reagon pas humbjes së Orbanit

Presidenti serb Aleksandar Vuçiç ka folur pas zgjedhjeve hungareze dhe fitores së Peter Magyar, e cila i dha fund dominimit të partisë së ish-kryeministrit Viktor Orban.

Vuçiç, i cili ka mbajtur marrëdhënie të ngushta politike me Orbanin për vite me radhë, e uroi fituesin e ri dhe theksoi rëndësinë e vazhdimit të bashkëpunimit të mirë midis dy vendeve.

“E përgëzoj Peter Magyarin për fitoren e tij zgjedhore. Jam i bindur se bashkëpunimi i fortë midis Hungarisë dhe Serbisë do të vazhdojë të rritet. Jam gjithashtu mirënjohës ndaj Viktor Orbanit për ndihmën në arritjen e marrëdhënieve të tilla”, shkroi Vuçiç në X.

Sipas disa mediave hungareze që nuk janë të afërta me qeverinë, fundi i fushatës zgjedhore u shënua gjithashtu nga polemika.

Pretendohet se një nga lëvizjet e fundit para zgjedhjeve mund të kishte pasur efektin e kundërt dhe të dobësonte më tej pozicionin e Orbanit.

Rasti që lidhet me gazsjellësin Turkish Stream, i cili furnizon gazin rus në Hungari përmes territorit serb, gjithashtu tërhoqi vëmendjen. Pasi u gjetën eksplozivë në një pjesë të tij, Orban dhe Vuçiç reaguan dhe lançuan një histori publike në lidhje me këtë incident.

Megjithatë, e gjithë tema u shua shpejt. Gazetarët hungarezë publikuan shpejt një korrespondencë të mëparshme në të cilën, siç pretendojnë ata, njerëz nga rrethi i ngushtë i Orbanit paralajmëruan për mundësinë e një ngjarjeje të inskenuar në kufirin me Serbinë.

Pas këtyre botimeve, historia u zhduk papritur nga sytë e publikut, megjithëse më parë kishte pasur njoftime për futjen e mundshme të një gjendjeje të jashtëzakonshme dhe madje edhe shtyrjen e zgjedhjeve.

(Kosova Sot Online)