Kosova është bërë një mozaik ku çdo parti ka territorin e saj

Shkruan: ANALISTI-Qani Shabani

Balotazhi i nëntorit 2025 tregoi se zgjedhjet lokale në Kosovë janë një test i aftësisë për qeverisje dhe legjitimitetit qytetar. Me pjesëmarrje që ra në vetëm 32% në raundin e dytë, qytetarët treguan lodhjen nga premtimet e pambajtura dhe nevojën për rezultate konkrete. Asnjë parti nuk arriti dominim absolut, duke shënuar një epokë të shpërndarjes së pushtetit dhe ekuilibrave strategjikë.

Lexoni edhe:

Kurti po tenton të rikonstruktojë figurën e tij si menaxher i ndershëm i parave publike

-LDK rikthehet gradualisht në skenën politike përmes fitoreve në Prishtinë, Pejë, Viti e Junik. Këto rezultate tregojnë një ringjallje të matur dhe të qëndrueshme, ku stabiliteti dhe qeverisja e përgjegjshme janë karta kryesore. Partia nuk e fiton dominimin spektakolar, por konsolidon imazhin e alternativës besueshme dhe të stabilitetit institucional, duke rimarrë terrenin komunë pas komune.

Lëvizja Vetëvendosje triumfoi në Mitrovicën e Jugut Gjilan, Fushë Kosovë dhe Obiliq, duke treguar fuqinë e saj qendrore. Megjithatë, humbja e Prishtinës, si bastion kryesor dhe simbol i pushtetit qendror, tregon kufizimet e karizmës dhe nevojën për ndërtimin e besimit lokal. LVV duhet të përqendrohet tek ndërtimi i rrjetit të besueshëm në komunat kyçe për të ruajtur influencën dhe legjitimitetin, pasi dominimi qendror nuk garanton sukses automatik lokal.

PDK fitoi Prizrenin, Vushtrrinë dhe Kaçanikun, por humbja e narrative të superioritetit tregon nevojën për transformim strategjik dhe ripërtëritje identitare. Pavarësisht se mbetet një lojtar i rëndësishëm lokal, partia përballet me sfidën e riorganizimit dhe të përshtatjes me një mjedis politik më të fragmentuar.

AAK triumfoi në Gjakovë, Suharekën dhe Klinën, duke demonstruar stabilitet rajonal, por mungesa e vizionit kombëtar e kufizon ndikimin e saj. Partia mbetet forcë lokale e fortë, por nuk ka potencial të rikthehet në dominues kombëtar pa strategji të reja dhe horizonte më ambicioze.

Lista Serbe triumfoi në 10 komunat me shumicë sërbe.Ajo duhet të ndërpresë ndikimin e jashtëm nga Beogradi dhe të fokusohet tek bashkëpunimi i plotë me institucionet shtetërore të Kosovës.Kjo transformon rolin e saj nga faktor paralel në partner të brendshëm për stabilitet dhe zhvillim lokal, duke forcuar qeverisjen komunale dhe pjesëmarrjen konstruktive në proceset shtetërore.

Kosova është bërë një mozaik politik, ku çdo komunë ka dinamikën dhe sfidat e veta, dhe ku çdo parti ka territorin e saj. Ky fragmentim politik kërkon aftësi koalicioni, menaxhim strategjik dhe fokus tek performanca lokale, pasi pushteti vendor nuk mund të sillet më si monopol qendror.

Humbja e Prishtinës nga LVV dhe shpërndarja e pushtetit vendor tregojnë se demokracia matet me performancën qeverisëse dhe besimin qytetar, jo me dominim absolut. Balotazhi i 2025 shënon fundin e epokës së dominimeve dhe fillimin e një politike ku strategjia, rrjeti lokal dhe besimi qytetar janë karta kryesore të suksesit. Kosova hyn kështu në një epokë të maturisë politike, ku qeverisja e përgjegjshme dhe bashkëpunimi institucional janë elementë vendimtarë të stabilitetit dhe zhvillimit.

Shkrimet në këtë rubrikë nuk shprehin qëndrimet e gazetës "Kosova Sot Online".