Lexoni edhe:
Aktorja e famshme ka shijuar bukuritë e Kosovës
Zbulohen 20 mijë gjurmë dinosauri në Itali
Një fotograf i botës së egër ka zbuluar rastësish gjurmë të dinosaurëve shumë pranë vendit ku do të mbahen lojërat olimpike në Itali.
Bëhet fjalë për një nga grupet më të vjetra dhe më të mëdha të njohura të gjurmëve në botë, që daton rreth 210 milionë vjet më parë - nga Periudha Triasike.
Zbulimi u bë në Parkun Kombëtar Stelvio në Bormio. Ekspertët vlerësojnë se mund të jetnë rreth 20,000 gjurmë në një sipërfaqe prej rreth pesë kilometrash ndërsa zona ndodhet pranë kufirit me Zvicrën. Kjo zonë ishte një zonë bregdetare në kohërat prehistorike, por deri më tani nuk kishte gjetur asnjë gjurmë të pranisë së dinosaurëve, sipas ekspertëve.
"Këtë herë realiteti e tejkalon vërtet imagjinatën", tha paleontologu Cristiano Dal Sasso i Muzeut të Historisë Natyrore në Milano, i cili mori telefonatën e parë nga fotografi Elio Della Ferrera pas zbulimit.
Sipas Dal Sasso, gjurmët e këmbëve ka të ngjarë t'u përkasin dinosaurëve barngrënës me këmbë të gjata, dykëmbësh, deri në 10 metra të gjatë dhe me peshë deri në katër ton, të ngjashëm me Plateosaurusin. Disa gjurmë janë deri në 40 centimetra të gjera dhe kthetrat janë qartë të dukshme.
Sipas asaj çfarë konstatohet në terren dinosaurët në këtë rast lëviznin në tufa dhe në disa pika duket se janë ndalur në modele rrethore, gjë që mund të tregojë sjellje mbrojtëse. "Ka indikacione shumë të qarta të dinosaurëve që ecin me një ritëm të ngadaltë, të qetë dhe të qëndrueshëm, jo duke vrapuar", tha Dal Sasso në një konferencë për shtyp.
Gjurmët u zbuluan shtatorin e kaluar, kur Della Ferrera po fotografonte drerë dhe shqiponja. Vëmendja e tij u tërhoq nga një sipërfaqe shkëmbore vertikale, rreth 600 metra mbi rrugën më të afërt, ku ai e kishte drejtuar kamerën e tij.
Vendndodhja, në një lartësi prej 2,400 deri në 2,800 metrash, në një shpat verior që mbetet në hije shumicën e kohës, i bëri gjurmët e këmbëve veçanërisht të vështira për t'u dalluar me sy të lirë. Siç raportoi fotografi, diçka e pazakontë i zgjoi kuriozitetin dhe ai u përpoq të ngjitej në shkëmb për të parë nga afër.
"Surpriza e madhe nuk ishte aq shumë që zbulova gjurmë këmbësh, por që zbulova një sasi kaq të madhe", tha Della Ferrera. "Ka fjalë për fjalë dhjetëra mijëra gjurmë këmbësh atje lart, pak a shumë të ruajtura mirë."
(Kosova Sot Online)
