Udinese e Valon Behramit e thellon në krizë Milanin dhe Gattuson
Milani ka dështuar të fitojë për ndeshjen e tretë më radhë në Serie A, pasi u ndal me barazim 1:1 nga Udinese e udhëhequr nga kosovari Valon Behrami.
Kevin Lasagna i siguroi një pikë Udineses në luftë për ta siguruar mbijetesën në Serie A kur shënoi golin e barazimit njëzet e pesë minuta para fundit, pasi Krzysztof Piatek e kishte kaluar në epërsi Milanin në fund të pjesës së parë.
Skuadra e Gennaro Gattusos dështoi përsëri ta rigjejë rrugën e fitores pas dy humbjeve radhazi kundër Interit dhe Sampdorias në dy javët paraprake, duke e vënë në rrezik pozitën e katër në përpjekje për t’u kualifikuar në Ligën e Kampionëve.
Me gjithë rastet e shumta dhe dominimin, kuqezinjtë e thyen akullin vetëm në minutën e fundit të pjesës së parë, kur Piatek shënoi pas tentimit të dytë.
Por, Lasagna e barazoi rezultatin me goditjen e dytë në portë të vizitorëve në këtë pjesë lojë.
Kjo pikë e çon Udinesen në pozitën e 15-të më 29 pikë, katër më shumë se Empoli në vendin e 18-të, pozitën që dërgon një ligë më poshtë.
Ndërkohë, Milani tani grumbullon 52 pikë në pozitën e katërt, katër më shumë se Lazio në pozitën e pestë. Por, lazianët kanë dy ndeshje më pak të zhvilluara.
(Kosova Sot)