Drita e mposht Feronikelin me rikthim
Drita e ka mundur me rikthim 2:1 Feronikelin në një ndeshje zbavitëse të dielën në Drenas, duke treguar sinjal të qartë për qëllimet e saj për ta mbrojtur titullin në Superligë.
Astrit Fazliu dhe Kastriot Rexha shënuan nga një herë në pjesën e dytë për kampionen në fuqi, për ta përmbysur Feronikelin që kishte kaluar në epërsi i pari përmes Mendurim Hotit në Stadiumin Rexhep Rexhepi.
Kjo është fitorja e dytë për klubit nga Gjilani nga po kaq ndeshje këtë sezon.
Feronikeli është tani në një seri prej katër ndeshjeve pa fitore, dy humbje dhe dy barazim, edhe pse e kishte nisur sezonin me fitore.
Skuadra e Afrim Tovërlanit kaloi në epërsi herët në takim, kur Hoti shënoi për 1:0 duke e shfrytëzuar një gabim trashanik të portierit Faton Maloku që e kishte braktisur portën në minutën e 19-të.
Një pjesë e dytë me lojë të hapur dhe futboll total, nisi me golin e Fazliut që shënoi me kokë pas një harkimi nga Erjon Vucaj në minutën e 53-të.
Rreth 20 minuta para fundit, Rexha shënoi nga një top i kthyer pasi e kishte goditur shtyllën fillimisht për ta mposhtur ish-klubin e vet.
Drita tani ka gjashtë pikë pas dy ndeshjeve, ndërsa Nikli mbetet në kuotën e pesë pikëve nga po aq ndeshje.
(Kosova Sot Online)
