Setien e thyen heshtjen për shkarkimin nga posti i trajnerit të Barcelonës

Quique Setien ka thënë se vendimi për ta shkarkuar atë nga posti i trajnerit të Barcelonës ishte marrë para humbjes historike të gjigantit katalonas me rezultat turpërues 8:2 kundër Bayern Munich.

Ish-trajneri i Real Betisit, e kishte marrë drejtimin e Barcelonës pas shkarkimit të Ernesto Valverdes në janar.

Setien dështoi në punën e tij, megjithatë, pasi ia dorëzoi titullin në La Liga rivalit Real Madrid, edhe pse ishte në krye të renditjes tabelore kur u emërua trajner i Barçës në fillim të vitit 2020.

Fati i tij u vulos përfundimisht kur Bayerni e shkatërroi plotësisht në çerekfinale të Ligës së Kampionëve, duke ia shkaktuar një humbje të paharrueshme katalonasve që çoi drejt lirimit të trajnerit nga detyra.

Por Setien këmbëngul se ai do të shkarkohej pavarësisht se çfarë do të ndodhte kundër Bayernit në atë në ndeshje në gusht.

“Nëse futesh në histori të Barcelonës me humbje të tillë, përfundon i dëmtuar pafundësisht”, tha Setien për El Pais.

“E marr mbi supe pjesën time të fajit. Një ditë do të shkruaj për këtë. Pasi u shkarkova, e kuptova se vendimi ishte marrë qysh para humbjes 8:2. Kam kuptuar gjithçka”, shtoi ai.

(Kosova Sot Online)