“Jemi favoritë kundër Moldavisë, do ta dëshmojnë këtë në fushë”

Ndihmëstrajneri i Kosovës Muharrem Sahiti beson se verdhekaltrit janë favoritë kundër Moldavisë në përballjen e drejtpërdrejt për qëndrim në Ligën C – nivelin e tretë të futbollit në Ligën e Kombeve.

Kosova e pret nesër Moldavinë në stadiumin Fadil Vokrri në takimin e fundit në Grupin 3, i cili njëkohësisht është përcaktues për fatin e këtyre dy kombëtareve në Ligën C.

Kosova është në vendin e tretë më një pikë më shumë se Moldavia që renditet e fundit dhe një barazim do t’ia siguronte qëndrimin në Ligën C dardanëve.

Verdhekaltrit janë në formë dëshpëruese dhe tejet të dobët, pasi përveç se nuk e kanë asnjë fitore në këtë edicion të Ligës së Kombeve, nuk dinë për fitore që prej tetorit të vitit të kaluar.

Duke folur në një konferencë për media të martën në Prishtinë, Sahiti – i cili do ta drejtojë skuadrën në mungesë trajnerit Bernard Challandes i cili vuan nga COVID-19 – beson se Kosova do ta dëshmojë në fushë se është më e mirë se Moldavia.

“COVID-19 dhe lëndimet na kanë prekur më së shumti neve. Në asnjë ndeshje nuk kemi qenë komplet dhe atë jo vetëm me një ose dy lojtarë por në çdo ndeshje kemi pasur 5-6 mungesa të rëndësishme dhe kjo sigurisht që e ka bërë të vetën”, tha Sahiti.

“Sigurisht që rikthimi i Shalës dhe Celinës na motivon për fitore. Moldavia nuk është kundërshtar i lehtë por ne jemi favorit dhe duhet ta dëshmojmë këtë në fushë. Ne hyjmë vetëm për fitore”, shtoi ai.

(Kosova Sot Online)