Interi e mposht Veronën, Juventusi ndalet nga Fiorentina

Interi e ka bërë një hap më afër titullit të parë në Serie A pas rreth një dekade, pasi e mundi Hellas Veronën 1:0, ndërkohë që rivali i tij Juventusi u ndal nga Fiorentina me një barazim 1:1.

Matteo Darmian e shënoi golin e vetëm dhe të tri pikëve për skuadrën e Antonio Contes në Giuseppe Meazza të dielën, ndaj një Verone kokëfortë.

Kjo fitore nënkupton se Interi tani ka krijuar një epërsi prej 13 pikëve ndaj Milanit, i cili e ka një ndeshje më pak të zhvilluar, dhe po aq ndaj Juventusit në vendin e tretë.

Zikaltrit vuajtën shumë për ta thyer akullin, në mënyrë që ta arrinin fitoren që i afron edhe më afër titullit.

Skuadra e Contes krijoi më shumë dhe ishte pranë golit të epërsisë kur Achraf Hakimi e goditi shtyllën nga gjuajtja e lirë.

Pak minuta pas asaj mundësie, Darmian, i ardhur nga stoli, shënoi në një kundërsulm të shpejtë të zikaltërve në minutën e 76-të. Ai e mposhti portierin me një goditje qendrore pasi u shërbye nga Alexis Sanchez në zonë.

Verona e mori lojën në dorë nga ky çast dhe rrezikoi disa herë, por ka qenë në gjendje ta mposhtë Samir Handanovicin.

Ndërkohë, Alvaro Morata e shpëtoi Juventusin nga një humbje tjetër, kur e shënoi golin e barazimit në minutën e parë të pjesës së dytë, pasi Vlahovic e kishte kaluar Fiorën në epërsi nga penalltia në fillim të pjesës së parë.

Nëse Atalanta dhe Napoli i fitojnë ndeshjet e tyre përkatëse këtë fundjavë, atëherë Juventusi do të bjerë në vendin e pestë në renditje.

(Kosova Sot Online)