Reagon UEFA, dënime për të gjithë ata që i heqin pijet nga tavolina e konferencave

  • A.P /
  • 17 qershor 2021 - 22:28
Reagon UEFA, dënime për të gjithë ata që i heqin pijet nga tavolina e konferencave

Cristiano Ronaldo hapi lojën e largimit të pijeve nga tavolina e konferencave për shtyp, teksa hoqi që aty dy shishe Coca Cola dhe këshilloi të gjithë të pinë ujë, pasi është i vetmi që të bën mirë.

Më pas ishte radha e Paul Pogba që të bëhej protagonist, duke larguar shishen e birrës Heineken nga tavolina, në përfundim të ndeshjes Francë-Gjermani, ndërsa së fundi ishte mesfushori i Italisë Manuel Locatelli, që gjithashtu largoi Coca Colën nga tavolina.

Këto gjeste të futbollistëve kishin tërhequr vëmendjen dhe ishin bërë temë diskutimi në shumë media sportive, teksa shkaktuan jo pak dëme ekonomike edhe te sponsorët e Europianit.

Pikërisht për këtë arsye, qeveria europiane e futbollit ka paralajmëruar të gjithë federatat pjesëmarrëse në Euro 2020 se do të përballen me gjoba të majme, nëse futbollistët apo trajnerët do të largojnë pijet e ofruara nga sponsorët në tavolina.

(Kosova Sot Online)