Prishtina dënohet rëndë nga FFK-ja pas përleshjes mes tifozëve, e pëson edhe Ballkani

Federata e Futbollit e Kosovës ka zbuluar dënimet e shqiptuara ndaj FC Prishtinës nga Komisioni Disiplinor, si dhe ndaj Ballkanit.

KD e FFK-së ka shqiptuar gjobë prej 1200 eurosh ndaj klubit kryeqytetas

FC Prishtina është dënuar gjithashtu edhe me dy ndeshje zyrtare të radhës jashtë fushës së vetë. Klubi “bardhekaltër” gjithashtu do të duhet të paguajë edhe dëmin e shkaktuar nga tifogrupi “Plisat” në stadiumin “Fadil Vokrri”, derisa shuma e dëmit të shkaktuar do të përcaktohet më vonë nga organi kompetent.

Kurse, FC Ballkani është dënuar me gjobë prej 1000 eurosh dhe gjithashtu klubi kampion në fuqi obligohet të paguajë dëmin e shkaktuar nga tifogrupi “Xhebrailat” në stadiumin “Fadil Vokrri”.

Këto masa ndaj Prishtinës dhe Ballkanit lidhen me incidentet e krijuara nga ndeshja e javës së pestë në Superligën e Kosovës.

(Kosova Sot Online)