Fonseca reagon pas triumfit në derbi ndaj Interit

Paulo Fonseca këmbëngul se ndryshimi i tij taktik te Milani në Derby della Madonnina nuk e “ndryshoi strukturën” e ekipit.

U përfol se një humbje në këtë ndeshje do të çonte në shkarkimin e trajnerit, pas vetëm një fitoreje deri tani këtë sezon, veçanërisht pas humbjes 3-1 në shtëpi kundër Liverpool-it në Ligën e Kampionëve në mesjavë.

Fonseca ndërmori veprime të forta duke ndryshuar sistemin në 4-4-2, dhe kjo dukej se dha rezultat, pasi aksioni individual i Christian Pulisic i dha atyre epërsinë e hershme në San Siro.

Megjithatë, Federico Dimarco barazoi me një lëvizje të mirë ekipore nga asistimi i Lautaro Martinez, ndërsa si Yann Sommer ashtu edhe Mike Maignan bënë pritje të mëdha.

Në minutën e fundit, Matteo Gabbia, ia siguroi fitoren, transmeton Gazeta Express.

“Ishte derbi, Milani nuk e kishte fituar për një kohë të gjatë, dhe sigurisht ishte e rëndësishme për formën tonë aktuale. Mendoj se lojtarët treguan shumë guxim dhe e meritonim fitoren. Nuk më kujtohet të kem parë një ekip që i ka shkaktuar kaq shumë probleme Interit për një kohë të gjatë,” tha Fonseca për DAZN.

Trajneri kaloi këtë javë në një sistem 4-4-2 me Tammy Abraham dhe Alvaro Morata në sulm, por ai argumentoi se nuk ishte një ndryshim aq radikal sa sugjerohej.

A është Fonseca i lumtur që për herë të parë ai mund të kalojë disa ditë pa u pyetur nëse e ardhmja e tij te Milani është në dyshim?

“Kjo nuk ka shumë rëndësi për mua, sepse nuk i lexoj apo dëgjoj këto gjëra,” tha pa emocion trajneri portugez.

“Do të jetë një javë me pak më shumë besim, por për mua është e rëndësishme të vazhdoj të shoh lojtarët të besojnë në idetë tona, ashtu siç kanë bërë deri tani. E dimë se duhet të përmirësohemi, por kjo ishte një fitore e lojtarëve sot.”

(Kosova Sot Online)