Man City e konfirmon lëndimin e Rodrit

Manchester City ka konfirmuar se mesfushori spanjoll Rodri pësoi një dëmtim në ligamentet e gjurit në ndeshjen kundër Arsenalit të dielën.

Rodri u zëvendësua në minutën e 21-të pasi pësoi një dëmtim pas një përplasjeje me Thomas Partey të Arsenalit gjatë një goditjeje nga këndi.

Ende nuk është përcaktuar një afat për rikuperimin e lojtarit, por pas fitores së Manchester City-t në Carabao Cup kundër Watford të martën, Pep Guardiola tha se ai pritet të qëndrojë jashtë për një periudhë të gjatë.

“Ende nuk kemi diagnozën përfundimtare, por do të jetë jashtë për një kohë të gjatë,” tha trajneri i City-t. “Megjithatë, disa mendime janë se mund të jetë më pak nga sa prisnim.

“Po presim telefonatat e fundit nga ai dhe mjekët për të mësuar saktësisht se çfarë ka dhe çfarë lloj ndërhyrjeje do t’i duhet.

“Presim që sonte ose nesër ta dimë saktësisht.”

Rodri ka udhëtuar në Spanjë për të parë një specialist pas testeve fillestare në Manchester.

Guardiola e ka përshkruar 28-vjeçarin si “të pazëvendësueshëm” – City nuk ka humbur në 48 ndeshjet e fundit të Premier League në të cilat ai ka startuar – por trajneri tha se do të gjejë një zgjidhje gjatë mungesës së tij.

City humbi katër nga pesë ndeshjet që Rodri mungoi sezonin e kaluar, ndërsa ai ka humbur vetëm një herë në 50 paraqitje në të gjitha garat.

Ai gjithashtu u shpall lojtari i turneut kur Spanja fitoi Euro 2024 në korrik dhe është një nga favoritët për të fituar Topin e Artë muajin tjetër – çmim që i jepet lojtarit më të mirë në botë.

Një javë më parë, ish-lojtari i Atletico Madrid, i cili luajti 63 herë për City-n dhe Spanjën sezonin e kaluar, deklaroi se lojtarët janë “afër” grevës për shkak të rritjes së numrit të ndeshjeve në kalendar, përfshirë Champions League të zgjeruar dhe Kupën e Botës për Klube.

(Kosova Sot Online)