Derbi madrilen në Champions
Sonte do të kompletohet çerekfinalja e Ligës së Kampionëve.
Katër ndeshje interesante do t’i përcaktojnë katër skuadrat që do ta presin nga një biletë për fazën tjetër.
Pa dyshim, dueli kryesor i natës do të jetë ai mes skuadrave madrilene, Atletico dhe Real.
“Los Blancos” e fituan përballjen e parë të së tetës së finales së Championsit ndaj “Los Colchoneros” me rezultat 2:1.
Por, ky rezultat nuk i siguron komoditet të madh ekipit të Carlo Ancelottit, i cili do të ketë punë të madhe për ta ruajtur këtë kapital të krijuar në “Santiago Bernabeu”.
Nga ana tjetër, trupa e Diego Simeones është e vendosur më shumë se kurrë më parë për ta bërë përmbysjen e madhe ndaj rivalit të përbetuar në “Wanda Metropolitano”.
Sonte në fushën e blertë do të zbresë edhe Lille i Edon Zhegrovës, ndonëse ylli kosovar s’do të jetë pjesë e kësaj ndeshjeje shkaku i lëndimit.
Skuadra franceze do të ketë punë me Borussia Dortmundin, derisa gjithçka mbetet e hapur në këtë sfidë pasi loja e parë në Gjermani përfundoi baras, 1:1.
Pra, të dy ekipet kanë gjasa për të ecur tutje në mesin e tetë më të mirëve të garës prestigjioze.
Arsenali e shkatërroi PSV Eindhovenin në udhëtim në lojën e parë duke fituar 7:1 dhe sonte “Gunners” do të luajnë veç sa për formalitet pasi kualifikimin tashmë e kanë në xhep.
Edhe Aston Villa e sheh veten më afër çerekfinales pasi sonte do të luajë në shtëpi me Club Bruggen, të cilin e kishte mundur në udhëtim 3:1 javën e kaluar.
Tri prej katër ndeshjeve të sontme të Championsit do të nisin nga ora 21:00.
(Kosova Sot Online)
