Barcelona nuk planifikon ta shesë Araujon

Barcelona nuk ka ndërmend të heqë dorë nga mbrojtësi uruguaian Ronald Araujo, pavarësisht spekulimeve të kohëve të fundit rreth një largimi të mundshëm nga “Camp Nou”.

Sipas mediave spanjolle, drejtuesit e klubit katalanas kanë vendosur që lojtari nuk është në listën e shitjes këtë verë. Trajneri i ri, Hansi Flick, thuhet se ka besim të plotë në potencialin dhe ndikimin që Araujo mund të ketë në skuadër, duke e konsideruar atë si pjesë të rëndësishme të planeve për sezonin e ri.

Sezoni i kaluar nuk ishte i lehtë për qendërmbrojtësin, i cili vuajti nga lëndime të njëpasnjëshme dhe gabime në ndeshje kyçe. Për pasojë, marrëdhënia me një pjesë të tifozëve u zbeh ndjeshëm. Megjithatë, klubi duket se e sheh situatën ndryshe dhe është i vendosur t’i japë atij një tjetër shans për të treguar vlerat e tij.

Sipas burimeve të njëjta, një transferim eventual i Araujos mund të ndodhë vetëm nëse vetë lojtari shpreh dëshirën për t’u larguar. Deri atëherë, Barcelona nuk ka asnjë qëllim për ta nxjerrë në treg mbrojtësin e kombëtares së Uruguait.

(Kosova Sot Online)