Zvicra dhe Kosova do të përballen mes vete këtë të premte

Zvicra dhe Kosova do të përballen mes vete këtë të premte në nismë të kampanjës kualifikuese për Botërorin 2026.

Në stadiumin e Baselit pritet të ketë shumë shikues shqiptarë, pasi dihet se në shtetin helvetik jetojnë shumë shqiptarë të Kosovës.

E për këtë është i vetëdijshëm edhe futbollisti zviceran, Cedric Itten, i cili u paraqit sot në konferencë për shtyp para ndeshjes me Dardanët.

“Duelet me Kosovën janë gjithmonë të veçanta. Është e qartë se Kosova do të ketë shumë tifozë në stadium”, u shpreh futbollisti zviceran, i cili u rikthye në Kombëtare pas një kohe të gjatë.

28-vjeçari është bashkëlojtar i Florent Muslijës tek Fortuna Dusseldorf, ndërsa e përcolli një mesazh që ia ka dhënë futbollisti dardan.

“Ai mezi po e pret këtë ndeshje dhe më tha se Kosova dëshiron të fitojë”, shton përfaqësuesi zviceran.

Ai e vuri në dukje synimin e Zvicrës për t’u kualifikuar në Botërorin 2026, objektiv i qartë ky i ekipit të selektorit Murat Yakin.

Krahas Kosovës dhe Zvicrës, në këtë grup gjenden edhe Suedia e Sllovenia.

Ekipi që përfundon i pari shkon direkt në garën që do të mbahet vitin tjetër në Shtetet e Bashkuara të Amerikës, Kanada dhe Meksikë, kurse i dyti do të luajë në “play-off”. 

(Kosova Sot Online)