Galatasaray e kërkoi Vedat Muriqin në momentet e fundit

Skuadra e njohur turke, Galatasaray, ka shfaqur interes për sulmuesin e Kosovës, Vedat Muriqi, në momentet e fundit të merkatos, sipas raportimeve të medias turke Fotomaç.

Sipas burimeve, klubi i Stambollit e ka parë Muriqin si një alternativë të tretë për sulmin, pas dy yjeve të saj, Mauro Icardi dhe Victor Osimhen, duke kërkuar të forcojë thellësinë e skuadrës në repartin ofensiv.

“Galatasaray, që janë të interesuar për një sulmues që do të jetë rezervë e Osimhen dhe Icardi, e ku ka vendosur të përfshijë Vedat Muriqin si synim”, shkruan Fotomaç.

Megjithatë, një transferim i tillë duket i pamundur në këtë moment, pasi Muriqi sapo ka nënshkruar kontratë me Mallorcan. Klubi turk ka tentuar manovra të fundit për të finalizuar marrëveshjen, por është përballur me kufizime.

(Kosova Sot Online)