A po përdoret Messi për zgjedhjet e ardhshme te Barcelona?

Presidenti i Barcelonës, Joan Laporta, e mirëpriti vizitën e Lionel Messit në “Camp Nou” të dielën në mbrëmje duke e quajtur “një akt spontan i një fansi të madh të klubit”, por brenda bordit të tij ka nga ata që dyshojnë se pas kësaj vizite mund të fshihet diçka më shumë.

Messi publikoi të hënën në mëngjes foto nga fusha e stadiumit në rrjetet e tij sociale, pasi kishte hyrë në “Camp Nou” pa dijeninë paraprake të klubit.

Ylli argjentinas dukej i lumtur që u rikthye për herë të parë në stadiumin që e la mes lotësh në vitin 2021, pa pasur mundësi të përshëndetej me tifozët në fushë. Në një intervistë të regjistruar para vizitës, Messi pranoi se atij dhe familjes së tij i mungon jetesa në Barcelonë, por Laporta e ka përjashtuar kategorikisht mundësinë që 38-vjeçari të rikthehet si lojtar.

Ndërkohë që Laporta deklaroi të mërkurën se “nuk po mendon për zgjedhjet”, Radio Catalunya raporton se disa anëtarë të bordit të tij dyshojnë se rivalë politikë të presidentit mund të kenë pasur dorë në vizitën e Messit. Emri i Víctor Font është përmendur si një nga ata që mund të ketë qenë i përfshirë.

Zgjedhjet e ardhshme në Barcelonë mund të mbahen brenda pesë muajve, dhe ka zëra se disa nga grupet opozitare po përpiqen të sigurojnë mbështetjen e Messit, e cila mund të ndikojë ndjeshëm në rezultatin përfundimtar. Familja e Messit thuhet se ende ndien padrejtësi ndaj Laportës për mënyrën se si ndodhi largimi i tij nga klubi, ndërkohë që Laporta fitoi zgjedhjet ndaj Font-it duke premtuar se do ta mbante Messin në skuadër.

Nëse Messi do të shprehte interes për të marrë pjesë në zgjedhje — për të cilat ka të drejtë vote si anëtar i klubit — kjo do të kishte një ndikim të jashtëzakonshëm te qëndrimi i shumë socios të Barcelonës. Megjithatë, në përgjithësi, ylli argjentinas ka shmangur deklaratat politike të drejtpërdrejta apo të hapura.

(Kosova Sot Online)