Bardghji mbyll derën për largim nga Barcelona

Barcelona po has vështirësi të rikthehet te rregulli 1:1, çka ka sjellë spekulime për largime të mundshme në janar. Njëri nga lojtarët që është përfolur për një largim është Roony Bardghji, i cili ka pasur vështirësi të marrë minuta të rregullta që nga transferimi i tij veror nga gjigantët danezë FC Copenhagen.

Bardghji ka bërë nëntë paraqitje në të gjitha garat për Barcelonën, me vetëm dy prej tyre si titullar. Pavarësisht kësaj, ai nuk ka asnjë dëshirë të largohet, duke hedhur poshtë çdo spekulim mbi situatën e tij në Katalonjë gjatë një interviste për Fotbolskanalen (përmes MD).

“Janë ato që shkruajnë mediat. Por unë ia kam kaluar shumë mirë dhe kam një marrëdhënie të mirë me Hansin, i cili është një trajner i mrekullueshëm. Ai dhe klubi kanë besim tek unë, gjë që do të thotë shumë. Ndihem shumë mirë. Po përmirësohem çdo ditë dhe po mësoj shumë. Kam pasur mjaft minuta loje, kështu që ndihem shumë mirë. Jam i durueshëm. Jam këtu vetëm tre ose katër muaj.”

Një nga nëntë paraqitjet e Bardghji-t erdhi në El Clasico, ku ai u fut si zëvendësues i vonshëm në fitoren 2-1 të Real Madridit në Bernabeu. Pavarësisht se ishte një pasdite zhgënjyese për Barcelonën, anësori pranoi se për të ishte një përvojë e paharrueshme.

“Është ndeshja më e rëndësishme dhe këtë mund ta ndjeje në media, kudo, madje edhe para ndeshjes. Kishte shumë intensitet në fushë dhe pas saj. Nuk mora pjesë (në përplasjen në fund), por ndodhën shumë gjëra. Ka shumë emocione, sepse është një ndeshje e rëndësishme dhe një rivalitet i madh. Është normale, por ishte e pabesueshme të isha aty.”

Bardghji është fatkeq që përpara tij në hierarki qëndron Lamine Yamal në krahun e djathtë, por megjithatë, ai ka treguar se është një opsion shumë i mirë për Hansin Flick. Prandaj, nuk do të kishte asnjë kuptim që ai të largohej kur të hapet merkatoja e dimrit, pavarësisht problemeve financiare të Barcelonës.

(Kosova Sot Online)