Ja kush e 'godet' rëndë Messin
Pezullimi gjashtëmujor i Juan Sebastián Verón ka shpërthyer një valë reagimesh dhe polemikash në futbollin argjentinas.
Bashkëshortja e tij, Valentina Martín, doli ta mbrojë me një postim në rrjetet sociale, ku jo vetëm shprehu mbështetjen për të, por sulmoi edhe drejtuesit e AFA-s dhe madje edhe Lionel Messin.
Megjithatë, tani kanë lindur dyshime për autenticitetin e postimit, i cili u bë viral shumë shpejt.
Sanksioni i vendosur nga Gjykata Disiplinore për Estudiantes de La Plata ishte pika ndezëse. Pas refuzimit për të bërë korridorin e kampionëve për Rosario Central dhe më pas realizimit të tij duke qëndruar me shpinë nga kundërshtarët, organi vendosi një dënim historik: gjashtë muaj pezullim për Juan Sebastián Verón, si dhe dy ndeshje pezullim për lojtarët e përfshirë, duke filluar nga viti 2026.
Në këtë kontekst, Valentina Martín, bashkëshortja e presidentit të klubit, “La Brujita” Verón, reagoi me një mesazh të drejtpërdrejtë që u përhap me shpejtësi në rrjetet sociale:
“Duan të të heqin qafe sepse kanë frikë prej teje. Asnjë hap pas, është koha të godasim dhe të përfundojmë me këtë mafia. Nuk ke vetëm mbështetjen e gjithë tifozëve të Estudiantes, por edhe të një pjese të madhe të futbollit argjentinas. Përpara Juan Sebastián. Përpara”, supozohet se ka shkruar ajo.
Mesazhi u interpretua si mbështetje emocionale, por edhe si një sulm i hapur ndaj drejtuesve të AFA-së dhe presidentit të saj Claudio “Chiqui” Tapia.
Një tjetër “screenshot” viral i atribuar Martín shtoi edhe më shumë tension:
“Ai nga Miami, anglezi, i shitur… ai që u kthye, ai që na bëri më të mëdhenj, i vetmi që ka guxim dhe mund të dëshmoj se lufton që gjithçka të jetë më mirë, dhe që është më argjentinas sesa ai që fitoi Kupën e Botës dhe jeton në Miami”, pretendohet se ka shkruar ajo.
Shumë e interpretuan këtë si një thumbim ndaj Lionel Messit, për shkak të qëndrimit të tij në Miami dhe marrëdhënies së tij të ngushtë me Tapian, si edhe ndaj Rodrigo De Paul, i cili shpesh shfaqet pranë presidentit të AFA-s në grumbullime dhe evente publike.
Në mes të gjithë kësaj, doli një pyetje e re: A është i vërtetë screenshoti i Valentina Martín?
Gazetari Agustín Mario Giménez vuri në dukje disa parregullsi teknike, si fakti që llogaria e saj është private, forma e tekstit, hapësirat mes rreshtave dhe përmasat e kutisë së tekstit, që nuk përputhen me postimet normale të “Instagramit”.
Këto vëzhgime rihapën debatin për përhapjen e përmbajtjeve të manipuluara dhe shpejtësinë me të cilën një screenshot mund të krijojë një narrativë të rreme pa verifikim.
E vetmja gjë e qartë është se futbolli argjentinas po kalon një tjetër episod tensioni të lartë, ku rrjetet sociale mund të ndezin apo shtrembërojnë çdo shkëndijë, dhe ku çdo fjalë – qoftë reale apo jo – mund të ndezë një zjarr të ri.
(Kosova Sot Online)
