Bayerni e blen një stadium për 7.5 milionë euro

“Kicker” raporton se Bayern Munich ka mbyllur një marrëveshje prej 7.5 milionë eurosh për të blerë stadiumin “Sportpark” të SpVgg Unterhaching.

Klubi i Bundesligës synon ta blejë këtë impiant me kapacitet 15 mijë vende, për ta shndërruar në shtëpinë e ardhshme të ekipit të femrave të Bayernit.

Ndërkohë, “Münchener Merkur” raporton se marrëveshja u finalizua me dyer të mbyllura të mërkurën në mbrëmje, pasi u sqarua e ardhmja e disa tribunave të stadiumit.

Unterhaching aktualisht garon në nivelin e katërt, Regionalliga Bayern, pasi ra nga 3. Liga sezonin e kaluar.

Klubi nga periferia e Mynihut dikur ishte pjesë e Bundesligës për dy sezone në fillim të viteve 2000, por nuk është rikthyer më në elitë që nga rënia në sezonin 2000/01.

Megjithatë, Bayerni ka ruajtur gjithmonë lidhje profesionale me fqinjët e tij periferikë, duke investuar te klubi si financiarisht ashtu edhe përmes marrëveshjeve për zhvillimin e lojtarëve.

Ekipi i femrave i Bayernit aktualisht luan ndeshjet në FC Bayern Campus në “Säbener Straße”, por ky impiant, që ka kapacitet vetëm 2,400 spektatorë, është konsideruar plotësisht i pamjaftueshëm për të pritur ndeshje të Kupës së Gjermanisë për femra (DFB Pokal) dhe të Ligës së Kampionëve.

Megjithatë, ekipi i femrave i Bayernit ndonjëherë luan edhe në “Allianz Arena”, ku së fundmi mblodhi mbi 15 mijë spektatorë në një ndeshje të Ligës së Kampionëve për femra kundër Arsenalit në mesin e nëntorit.

(Kosova Sot Online)