Nëse Vinicius është i lirë, Arabia Saudite do ta transferonte

Ylli i Real Madridit, Vinicius Junior, duket se është më i lumtur nën drejtimin e Alvaro Arbeloas, ndërsa po flitet se rinovimi i kontratës së tij mund të shënojë përparim në të ardhmen e afërt.

Braziliani ka kontratë deri në vitin 2027, që do të thotë se “Los Blancos” janë të vendosur ta mbyllin një marrëveshje të re para muajit shtator, përndryshe do të rrezikonin seriozisht ta humbnin falas.

Vinicius dhe Real Madridi kanë qenë në një ngërç që nga qershori sa i përket kontratës së re, por si klubi ashtu edhe lojtari duket se janë të interesuar ta finalizojnë marrëveshjen.

Gjatë dy viteve të fundit ka pasur shumë zëra se Arabia Saudite po përpiqej ta joshte me një ofertë të madhe për ta transferuar në Lindjen e Mesme, por këto thashetheme janë zbehur muajt e fundit.

Megjithatë, gjatë një interviste për Cadena SER, drejtori ekzekutiv i Al-Hilal, Esteve Calzada, ka konfirmuar se Fondi i Investimeve Publike (PIF) vazhdon të jetë i interesuar për nënshkrimin e tij.

“Në rastin tonë nuk ka bisedime, por drejtori ekzekutiv i ligës saudite, sa herë që pyetet, thotë se nëse ai bëhet i disponueshëm, do të përpiqet ta sjellë,” u shpreh Calzada.

(Kosova Sot Online)