Një bashkëpunim me Drake? Noizy tregon planet për 2022-shin

Reperi Noizy ka arritur një sukses të madh edhe këtë vit, pas një rrugëtimi të jashtëzakonshëm në karrierën e tij. I ftuar në “Jonida’s Room”, ai ka rrëfyer ndjesitë që i ka lënë 2021 dhe ka zbuluar planet e vitit që sapo ka filluar.

Ai ka patur shumë bashkëpinime, por ai ka veçuar si më të suksesshmin atë me këngëtaren Dhurata Dora, “Mi amor”.

“Siç u pa edhe nga shifrat bashkëpunimi më i suksesshëm ka qenë ai me Dhurata Dorën, kemi super bashkëpunime me artistë të tjerë për 2022 dhe mbi të gjitha një super album për të cilin kam patur gjithë kohën për ta punuar”, ka thënë Noizy.

Noizy ka treguar se albumi i tij i ri do të përmbajë rreth 20 këngë, dhe se e konsideron këtë albumin e tij të preferuar.

Reperi tregoi se do të ketë bashkëpunime edhe me repera të njohur ndërkombëtarë, një reper francez e anglez.

“Bashkëpunoj më shumë me repera të Europës sepse kam Vibe shumë të mirë, ndërsa reperat amerikanë kërkojnë lekë dhe nuk ta japin suportin”.

Ndërkohë, këngëtari ka habitur me një deklaratë ku thotë se bashkëpunimi me yllin ndërkombtar Drake është i realizueshëm.

“Do të doja shumë të bëja një bashkëpunim me Drake, që ndoshta edhe mund të realizohet sepse ai vjen shumë shpesh në Angli. Por me të mund të realizohet një bashkëpunim vetëm nëse i pëlqen “vibe”, sepse ai s’ka nevojë për lekë”, ka thënë Noizy.

Noizy ndau gjithashtu me shikuesit një nga aventurat e tij.

“Më ka qëlluar që për 24 orë të jem në 6 shtete, kam qenë në Malmo, kam marrë trenin deri në Danimarkë, pastaj nga aty në Austri, Kosovë, Shqipëri dhe në 6 mëngjesit kam mbërritur në Itali.”, ka thënë Noizy.

(Kosova Sot Online)