Mashtrime, dallavere, falsifikime, trillime, sabotime, kërcënime...
Eksperti i fushës së të drejtës, Skënder Kapiti, duke par mungesë vullneti politik e institucional në Republikën e Kosovës për ta instaluar shtetin ligjor, për të luftuar krimin dhe korrupsionin dhe pasurimin e kundërligjshme të “jakave të bardha”, ka thënë se janë shndërruar në fraza të kota, zotimet e premtimet e zyrtarëve përgjegjës për zero tolerancë kundër krimit e korrupsionit, sepse hapi i parë që do të duhej bërë do ishte bërja Ligjin për prejardhjen e pasurive të zyrtarëve të lartë, që nuk po bahet tash e dy dekada në Kosovën e pas luftës, një dekadë e plotë në shtetësi të pa varur.
Sipas Kapitit, derisa të gjitha deklarimet e pushtetarëve për gjoja luftë kundër korrupsionit janë realisht gënjeshtra, mashtrime, dallavere, falsifikime, trillime, sabotime vrazhdësi, kërcënime, dhunë, zhvatje, reket, privilegje, derdhje të financave shtetërore, shantazhime që e asgjësojnë atë luftë jo ekzistente kundër korrupsionit, zgjidhja e vetme mbetet bërja e Ligjit VETTING, model që po jep rezultate në Shqipëri, sado me vështirësi por që procesi po ecën përpara.
“Hetimi i duhur ligjor për origjinën, prejardhjen dhe për pasuritë e personazheve VIP të politikes e pushtetit në Kosovë nuk bëhet , pasi një gjë e tillë është në anti tezë dhe në kundërshti të thellë me tërë sistemin e deritanishëm politik e juridik që është ngritur dhe montuar si në Shqipëri dhe në Kosovë. E gjithë piramida politike dhe qeverisëse, sistemi i drejtësisë dhe institucionet e tjera shtetërore janë infektuar rëndë nga vjedhja, pa përgjegjshmëria dhe korrupsioni. Puna politikbërëse, posti e detyra shtetërore qendrore dhe vendore e kudo nëpër administrata e dikastere janë mundësi, shanse, fate dhe të drejta shfrytëzimi e përfitimi për para e pasuri, për shmangie taksash e detyrimesh, për evazion fiskal dhe për kontrabande, për vjedhje dhe abuzime në tenderë e privatizime, për matrapazllëqe e trafikime të ligjit dhe të drejtësisë”, theksoi Kapiti për “Kosova Sot Online”.
Pradnaj sipas tijë, shpresa dhe fshesa që e pastron këtë strukturë mbetet VETTING-u. “Kjo zallamahi emocionale dhe ligjore e tipit xhungël, ku ligjin e bën krimi, korrupsioni, kërcënimi, vjedhja e grabitja politiko-ligjore e ka bërë inekzistent drejtësinë, lirinë, ndershmërinë, shpresën dhe besueshmërinë te shteti e drejtësia. Prandaj vetëm je VETTING gjithëpërfshirës do ta bënte të mundur në një fare mase zbulimin ,hetimin dhe konfiskimin e pasurive të fituara në mënyrë të paligjshme si dhe pastrimin e politikës e të gjyqësorit të korruptuar e të kriminalizuar”, tha Kapiti për “Kosova Sot Online “.
(Kosova Sot Online)
