Zviceranët votojnë për ndryshimin e ligjit për armëmbajtje

Zviceranët do të marrin pjesë në një referendum të dielën për të vendosur rreth ashpërsimit të ligjit për armëmbajtje sipas rregullave të Bashkimit Evropian. Zvicra nuk është anëtare e BE-së, por është pjesë e Marrëveshjes së Shengenit për kufij të hapur.

Pas sulmeve të Parisit që ndodhën më 2015, në të cilat u vranë 130 njerëz, Bashkimi Evropian solli masa të reja për armët automatike dhe gjysmautomatike. BE-ja shpreson që këto rregulla do t’i ndihmojnë policitë e vendeve që janë pjesë e Shengenit.

Këto shtete e kanë shtuar bashkëpunimin dhe shkëmbejnë të dhëna përditë për të zbuluar se nga kanë ardhur armët që përdoren në krime.

Megjithatë, këto propozime kanë ngjallur mospajtime në Zvicër, e cila ka një traditë të gjatë të armëmbajtjes. Pasi zviceranët kryejnë shërbimin e detyrueshëm ushtarak, ata kanë të drejtë t’i mbajnë armët.

Në secilin qytet dhe fshat të Zvicrës ka klube të armëve dhe qitja në shenjë është sport shumë i popullarizuar. Sipas ligjit zviceran, personi që mban armë duhet të ketë leje për të, por marrja e saj është proces relativisht i lehtë.

Beat Bosinger, kandidat i Partisë Popullore Zvicerane, është kundër ndryshimit të ligjit për armëmbajtje. “Nuk ka arsye për ligje të reja. Kjo do të ishte shkelje e besimit. Ne zviceranët dimë si t’i menaxhojmë armët”, tha ai.

Pavarësisht se në Zvicër qarkullojnë rreth 2.3 milionë armë, niveli i krimit në këtë shtet vazhdon të mbetet në nivel më të ulët se në shtetet fqinje, shkruan “BBC”,.

(Kosova Sot Online)