Krasniqi: Harrojeni vetëm për një moment protagonizmin, miratojeni Tribunalin

Shefi i Grupit Parlamentar të Partisë Demokratike të Kosovës, Memli Krasniqi, ka kërkuar nga deputetët e Kosovës që të lënë anash tendencat për protagonizëm.

Pas miratimit të kërkesës së PSD-së, për krijimin e një komisioni parlamentar për Tribunalin që gjykon krimet serbe në Kosovë, Krasniqi ka kërkuar që sot të mblidhet ky komision dhe të diskutohet për hapat në vijim.

Ai tha se me interesat dhe inatet politike, po rrezikohet një proces shumë i rëndësishëm.

“Ku është logjika tash me bo edhe një komision. A jemi tu fol për komisionin që e prezantoi PSD, veç tash LDK pak në formë ndryshe apo jemi duke folur për dy komisione, sepse ne e kaluam. Ky kuvend e votoi një komision parlamentar për këtë punë. Çka po lypni tash edhe një komision tjetër apo mos po doni atë komision të kaluar me ja dhënë këtë mandat. Ju kisha lut seriozisht harrone vetëm për një moment protagonizmin prej neve PDK-së prej juve LDK-së e tërë tjerët bashkë. Hajde merremi vesh, se me të vërtetë u bëmë horë para këtyre njerëzve që përfaqësojnë familjet e të zhdukurve që i kemi në sallë, e ende më shumë prej atyre që janë duke na përcjellur”, tha Krasniqi.

(Kosova Sot Online)