Kështu i shpëtoi therjes me thikë një polic nga Peja
Mëngjesin e sotëm në Pejë është sulmuar me thikë një zyrtar policor. Ai ka pësuar lëndime trupore, ndërkaq rasti po cilësohet “Vrasje në tentativë”.
Rastin për media e ka konfirmuar Zëdhënësi i Policisë për Rajonin e Pejës, Driton Rugova.
“Sot rreth orës 11:55 ne rrugën Mbretëresha Teutë, ka ndodhur një rast ku është sulmuar papritmas një zyrtar policor, i cili ka pësuar lëndime trupore nga një mjet i mprehtë (thikë). Falë shkathtësive profesionale të zyrtarit policor dhe ndihmës se një qytetari është arritur që viktima të shpëtoj me jetë, personi i dyshuar është arrestuar, gjendja e viktimës sipas ekipit mjekësor është jashtë rrezikut për jetë”, ka thënë Rugova.
Rugova ka theksuar se me urdhër të prokurorit të shtetit i dyshuari dërgohet në mbajtje, ndërsa rasti cilësohet ” Vrasje në tentativë”.
“Hetuesit do të ndërmarrin të gjitha veprimet e nevojshme për të kuptuar rrethanat e këtij rasti”, ka thënë Rugova.
(Kosova Sot Online)
