Faqet e PDK-së e shpërndajnë një video që mund ta rrezikojë jetën e Vjosa Osmanit

  • 05 September 2019 - 11:55
Faqet e PDK-së e shpërndajnë një video që mund ta rrezikojë jetën e Vjosa Osmanit

Një faqe e Partisë Demokratike të Kosovës në rrjetin social Facebook, e emëruar me emrin “Rinia Demokratike e Kosovës”, ka shpërndarë një video e cila mund të rrezikojë jetën e kandidates së LDK-së për kryeministre, Vjosa Osmani.

Sipas përshkrimit të bërë në video të shpërndarë nga kjo faqe e partisë së Kadri Veselit, flitet për një person të quajtur “Krenar Jahiu”, e për të cilin kjo faqe pretendon se “është kushëriri i burrit të Vjosa Osmanit dhe se ka shërbyer për Sllobodan Millosheviqin”.

Në video krahas fotos për të cilën kjo faqe pretendon se është origjinale e në të cilën pretendohet se shihet edhe personi i quajtur Krenar Jahiu, është bashkëngjitur edhe fotografia e Vjosa Osmanit bashkë me burrin e saj, Prindon Sadriu.

Në fund të videos lihet madje edhe një mesazh në gjuhën angleze “We will find you where you are” apo përkthyer në shqip “Ne do të gjejmë ku je”.

Kjo video është publikuar në kohën kur kandidatja e LDK-së, Vjosa Osmani, ia ka mësyrë garës për t’u bërë kryeministre e Republikës së Kosovës në zgjedhjet që do të mbahen më 6 tetor. 

(Kosova Sot Online)