Kandidatja e PDK’së i del në mbrojtje mësuesit në Prizren
Kandidatja për deputete nga radhët e PDK’së, Besa Ismaili, e quan të drejtë kushtetuese, veprimin e mësuesit në Prizren, i cili fotografoi nxënësit duke i nderuar sulmet ushtarake të Recep Tayyip Erdogan ndaj civilëve kurdë.
Shumë reagime ka nxitur fotografia e një mësuesi të një shkolle në Prizren, ku nxënësit e tij qëndrojnë gatitu, ashtu sic po qëndrojnë në Turqi së fundmi për të nderuar sulmet ushtarake të urdhëruara nga Erdogani ndaj kurdëve.
Por këto reagime, kandidates për deputete i duken antikushtetuese, pasi ajo thotë se komuniteti turk ka të drejtë të shfaqë flamurin e vet.
“Seriozisht, a i bie kjo që pjesëtarët e komunitetit turk në Kosovë, mësues e nxënësit , nuk u lejohet të shfaqin flamurin e tyre? Mendoja që kjo është e drejtë kushtetuese, apo nuk është kështu kryetar [i drejtohet kryetarit të Prizrenit, Mutaher Haskuka]”, ka shkruar Besa Ismaili në Tëitter.
Ndërkaq mësuesi në Prizren i ka thënë sot mediave se nuk ka qenë kërkesë e tij ajo fotografi, porse nxënësit e kanë bërë me vetëdëshirë.
(Kosova Sot Online)