Vazhdon dhuna në Irak, policia vret tre protestues

  • 05 nëntor 2019 - 10:54
Vazhdon dhuna në Irak, policia vret tre protestues

Forcat irakiane të sigurisë i kanë vrarë tre protestues të tjerë në vargun e kryengritjeve të dhunshme që nisën para më shumë se një muaji.

Policia i vrau dy njerëz dhe i plagosi 12 të tjerë në Shatra. Lajmin e konfirmuan burimet spitalore dhe zyrtarët e sigurisë. Mjekët thanë se këta dy persona vdiqën nga plagët e plumbave në kokë. Një burim i sigurisë tha se ata ishin përpjekur ta sulmonin shtëpinë e një zyrtari të lartë qeveritar.

Në një rast tjetër, një protestues u vra dhe 34 të tjerë u plagosën kur forcat e sigurisë filluan të qëllojnë me armë ndaj protestuesve në hyrjen e një porti në Umm Qasr. 

Zyrtarët e sigurisë në Basra e futën në fuqi orën policore nga ora 22 e së hënës në përpjekje për ta shpërndarë turmën e protestuesve. Policia paralajmëroi se do ta përdorte dhunën, nëse është e nevojshme për ta arritur qëllimin.

Më shumë se 250 njerëz janë vrarë gjatë protestave që filluan më 1 tetor kundër korrupsionit dhe shkallës së lartë të papunësisë së rinisë.

Dhunën në Irak e dënoi edhe e dërguara e Kombeve të Bashkuara për Irakun, Jeanine Hennis-Plasschaert, e cila bëri thirrje për dialog për t’i zgjidhur problemet në këtë shtet, shkruan “Reuters”.

(Kosova Sot Online)