Dështimi i madh, ndizet alarmi: Vetëm kështu Kosova kap ‘peshqit e mëdhenj’

“Kjo kapje e krimit të organizuar, duket të jetë shumë e fortë dhe po i bën te gjitha institucionet vitale te shtetit, ashtu qe protagonistë e politikanë të qeverisë, të presidencës dhe vet deputetët e legjislativit,sikur edhe kupolat e KGJK, të KPK-së nuk po marrin më as mundin se pakut t’i përgjigjen se duan a po nuk duan të bëjnë e aprovojnë ligjin e dekriminalizimit të politikës, sikur edhe ligjin mbi VETTING-un për vetëpastrimin e gjyqësorit, prokurorisë, policisë, avokatisë, por edhe te gjitha institucioneve te shtetit, për të krijuar bazat reale për sundimin e ligjit dhe shtetit e te drejtës edhe ne Kosove”, thotë analisti politik, Gani Qarri për “Kosova Sot Online”.

Kosova po shkelë në vitin 2020 akoma pa i ndërtuar institucionet e reja pas zgjedhjeve të 6 tetorit të vitit të kaluar, një problem që paraqet sfidë në vete për shoqërinë dhe qytetarët e Kosovës.

Në vitin 2020, sipas analistëve politikë do të barten të gjitha problemet që mbetën të pa zgjidhura nga qeverisjet e kaluara, e për të cilat do kërkohet zgjidhje nga qeveria në ardhje, pasi edhe premtimet e fituesve të zgjedhjeve, LVV dhe LDK kanë qenë të atilla, se në koalicionin e tyre qeverisës do të jenë top prioritet zhvillimi ekonomik, drejtësia dhe lufta kundër krimit e korrupsionit.

Për mundësinë dhe kapacitet e ballafaqimit me këto sfida, për “Kosova Sot Online” flet analisti politik, Gani Qarri.

Sipas Qarrit, është e kotë çdo përpjekje e ecjes përpara në qeverisjen e vendit, nëse në top prioritet nuk vendoset drejtësia dhe lufta kundër krimit.

“Fatkeqësisht sfidat më të mëdha për Kosovën edhe ne vitin 2020, padyshim se do të jenë korrupsioni dhe krimi i organizuar të cilat seriozisht vazhdojnë ta pengojnë zhvillimin dhe prosperitetin në Kosovë. Për aq më tepër krimi I organizuar dhe korrupsioni,do të vazhdojë edhe më tej, të jenë njollë e zezë për Kosovën, dhe akte që po ia ndalin frymën këtij vendi dhe populli. Pa luftimin e njëmendtë të krimit te organizuar i cili ka depërtuar jo vetëm në institucionet e shtetit por edhe deri tek kokat kryesore të pushtetit, qoftë në nivelin qendror ashtu edhe në atë komunal, nuk ka shans që edhe në Kosovë të sundoj ligji, e jo “Maliqi”! E duke qenë kështu dështoi qëllimshëm politika në Kosovë që edhe këtë vit ajo të mos fillojë reformën në drejtësi dhe procesin e Vettingut, dekriminalizimin e politikës dhe pushtetit, hapjen e dosjeve dhe ligjin anti-mafia”, thotë analisti Qarri për “Kosova Sot Online”. 

Prandaj sipas Qarrit, për drejtësinë e kapur kosovare, viti që po lëmë pas do të shënohet si një vit i humbur, pasi që gjyqësia e kalbur edhe më 2019 dështoi plotësisht që në bankën e të akuzuarve ta vendosë qoftë edhe një, nga të ashtuquajturit peshqit e mëdhenj.

“Ndaj me të drejtë lind pyetja se deri kur drejtësia e shitur dhe e trafikuar vendore,do të vendoset kryesisht nga pazaret kriminale interferuese e ndikuese dhe sekserët e mafio-oligarkëve politik dhe të mafio-oligarkëve të bizneseve të kriminalizuara që shëtisin lirshëm nëpër këto institucione të drejtësisë, bëjnë korruptimin e gjyqtarëve dhe prokurorëve në drejtësi, dhe që në fakt edhe në baza ditore bëjnë krimin e organizuar nëpër prokuroritë dhe nëpër gjykatat e faktit në Kosovë”, shton analisti Qarri për “Kosova Sot Online”.

Sipas tij, vetëm bërja e ligjit Vetting për pastrimin e drejtësisë dhe të të gjitha institucioneve të tjera të sigurisë, mundë të jep shpresë për qytetarët, për instalimin e qëndrueshëm të një drejtësie të pavarur dhe efektive në luftën kundër krimit të organizuar dhe korrupsionit.

“Kjo kapje e krimit të organizuar, duket të jetë shumë e fortë dhe po i bën te gjitha institucionet vitale te shtetit, ashtu qe protagonistë e politikanë të qeverisë, të presidencës dhe vet deputetët e legjislativit , sikur edhe kupolat e KGJK, të KPK-së nuk po marrin më as mundin se pakut t’i përgjigjen se duan a po nuk duan të bëjnë e aprovojnë ligjin e dekriminalizimit të politikës, sikur edhe ligjin mbi VETTING-un për vetëpastrimin e gjyqësorit, prokurorisë, policisë, avokatisë, por edhe te gjitha institucioneve te shtetit, për të krijuar bazat reale për sundimin e ligjit dhe shtetit e te drejtës edhe ne Kosove”, përfundon analisti politik, Gani Qarri për “Kosova Sot Online”.

(Kosova Sot Online)