Këshilltari i Kurtit: Thaçi na e bëri një dhuratë plot helm
Presidenti i Kosovës, Hashim Thaçi dhe ai i Serbisë, Aleksandër Vuçiq, u takuan mbrëmë në Shtëpinë e Bardhë me ndërmjetësimin e ambasadorit Richard Grenell, i dërguar i posaçëm i Presidentit Trump për bisedimet Prishtinë-Beograd dhe Këshilltarit për Siguri Kombëtare Robert O’Brien.
Pas takimit, Thaçi shkroi në Facebook se “Kosova është e bekuar me mbështetjen e Amerikës dhe Presidentit Trump”.
Por, pas këtij takimi ka reaguar edhe këshilltari i kryeministrit Albin Kurti, Elvis Hoxha përmes një shkrimi në Facebook.
Sipas Hoxhës presidenti Thaçi po kthehet i kënaqur sepse e ka gjetur një dhuratë të re plot helm.
“Presidenti Thaçi po kthehet i kënaqur sepse na i ka gjetur një dhuratë të re plot helm. Të paktën këtë la të kuptohet postimi i tij” shkruan Hoxha.
Ndryshe, për këtë takim të presidentit Thaçi dhe homologut të tij serb nuk dinte asgjë as Qeveria e Kosovës.
Këtë e ka konfirmuar zëvendëskryeministri Haki Abazi.
“Lajmi për takimin është vetëm përmes mediave. Unë e kam thënë disa herë në ditët e fundit, edhe sot në Kuvendin e Kosovës, që presidenti është duke vepruar nga një hapësirë jotransparente dhe në mungesë të plotë të koordinimit me institucionet e Kosovës”.
(Kosova Sot Online)
