Kurti i jep autorizim Bislimit t’i marrë 48 milionë dollarë kredi për ta luftuar COVID -19

  • 08 maj 2020 - 17:28
 Kurti i jep autorizim Bislimit t’i marrë 48 milionë dollarë kredi për ta luftuar COVID -19

Kryeministri në detyrë, Albin Kurti, sot ka autorizuar ministrin e Financave, Besnik Bislimin për të marrë kredi nga Banka Botërore në vlerë të 48 milionë dollarëve me qëllim të luftimit të COVID-19. Një vendim i tillë është marrë në mbledhjen e sotme të Qeverisë.

Qeveria në detyrë e Republikës së Kosovës, me kërkesë të Kryeministrit në detyrë Albin Kurti, kanë mbajtur sot mbledhjen e 29-të e Qeverisë, në të cilën ka shqyrtuar dhe miratuar nismën për negocimin e Marrëveshjes së Kredisë në mes të Republikës së Kosovës, e përfaqësuar nga Ministria e Financave dhe Transfereve, dhe Bankës Botërore, e përfaqësuar nga Asociacioni Ndërkombëtar për Zhvillim për financimin e “Projekti emergjent COVID-19 për Kosovën”.

Sipas kësaj Marrëveshjeje, Asociacioni pajtohet që t’i japë Republikës së Kosovës një kredi, e cila konsiderohet si financim koncesionar në vlerë prej 48 milionë dollarë.

Mjetet nga kjo kredi do të përdoren për parandalimin, detektimin dhe reagimin ndaj kërcënimeve të pandemisë COVID-19 në Kosovë dhe për forcimin e sistemit të shëndetit publik në Kosovë.

Sipas njoftimit të kryeministrisë një plan i tillë do të realizohet përmes realizimit të objektivave:

–   fuqizimin e kapaciteteve për detektim të hershëm, konfirmim dhe raportim të hershëm të rasteve, gjurmim të kontakteve si dhe raportim e monitorim të tyre;

–   intervenimi në forcimin e sistemit shëndetësor në Kosovë;

–   zhvillimi dhe shpërndarja e informatave, udhëzuesve, trajnimeve dhe prezantimeve të profesionistëve të kujdesit shëndetësor;

Marrëveshja e kredisë parasheh edhe përkrahjen sociale në familje për respektimin e masave të kontrollit të shëndetit publik, mirëmbajtjen e shpërndarjes së pagesave sociale, rritjen dhe zgjerimin e tyre.

(Kosova Sot Online)