61-vjeçari i dënuar përjetë, arrestohet pas 23 vitesh në Hanin e Hotit

A.P /
18 August 2020 - 16:31

Shtetasi Fran Gjergj Prendi nga Fushë Arrëzi i Pukës është arrestuar sot në Han të Hotit pasi është dënuar me burgim të përjetshëm për një vrasje 28 vite më parë.
61-vjeçari u arrestua në pikën doganore të Hanit të Hotit pasi ishte marrë informacioni në rrugë operative se do të hynte në territorin shqiptar.
Bëhet me dije se në vitin 1992 ky shtetas ka vrarë një person tek rezervuari i Pukës, teksa në vitin 1994 mori dënimin nga Gjykata me burg të përjetshëm.
Duke përfituar nga ngjarjet e ’97 ai u largua nga burgu i Bënçës në Tepelenë por tashmë pas 23 vitesh ai është arrestuar.
Madje Prendi ishte dhe ndër 50 shqiptarët më të kërkuar nga Njësia e Posaçme e Kërkimit ”Fast” e cila u informua për ardhjen e tij, teksa Prendi dha gjeneralitete të tjera në Pikën Kufitare për të mos u identifikuar por nuk ia arriti qëllimit.

Lexoni edhe:

Shkencëtarët zbulojnë gjashtë koronavirusë të rinj te lakuriqët

NJOFTIMI NGA POLICIA

Policia e Shtetit
Kapet në PKK Hani i Hotit dhe vihet në pranga një person i shpallur në kërkim ndërkombëtar , i dënuar me burgim të përjetshëm për vrasje
Falë bashkëpunimit dhe shkëmbimit të informacionit mes Njësisë së Posaçme të Kërkimit “Fast” me strukturat homologe të vendeve evropiane që bëjnë pjesë në rrjetin ENFAST, si dhe pas koordinimit të veprimeve me shërbimet e Policisë Kufitare të Hanit të Hotit u bë e mundur kapja dhe prangosja e 61 vjeçarit nga Fushë Arrëz, Pukë.
Shërbimt e Policisë Kufitare të Hanit të Hotit në bashkëpunim me Njësinë e Posaçme të Kërkimit në Policinë e Shtetit dhe me Drejtorinë Vendore të Policisë Shkodër, në Pikën Kufitare të Hanit të Hotit bënë të mundur kapjen dhe prangosjen e personit në kërkim ndërkombëtar:
Fran Prendi 61 vjeç, lindur në fshatin Buhot, Njësia Administrative Rrape Bashkia Puke, i dënuar me burgim të përjetshëm .
Ky shtetas me vendim Nr 18, date 05.04.1994, të Gjykatës së Rrethit Gjyqësor Pukë, është dënuar me burgim të përjetshem për veprën penale të “Vrasje me dashje për motive të dobëta”.
Dënimi i tij është bërë për arsye se me datë 09.03.1992, rreth orës 19.00, në vendin e quajtur tek rezervuari i qytetit Pukë, ka kryer krimin e vrasjes për motive të dobëta të një shtetasi.
Për këtë krim ky shtetas ishte arrestuar dhe ka qenë duke vuajtur dënimin në burgun e Bënçës Tepelene por me ngjarjet e vitit 1997, është larguar nga burgu.
Falë bashkëpunimit të Njësisë së Posaçme të Kërkimit “Fast”, me strukturat homologe të vendeve evropiane që bëjnë pjesë në rrjetin ENFAST, u mor infomacion për ardhjen e këtij shtetasi në drejtim të Shqipërisë , i cili në pikën e kalimit kufitar ka dhënë gjeneralitete të tjera me qëllim mos identifikimin, por është vënë në pranga pas verifikimeve të hollësishme.
Ky shtetas bënte pjesë në listën me 50 më të kërkuarit që janë objekt i punës së kësaj njësie të posaçme për ti kapur.